Kansa se kanker waarskuwingstekens

THABAZIMBI – Die nuwe Kansa Koördineerder van Kansa Thabazimbi-tak, Sr Adele da Silva, sien die groot taak van kanker-bewusmaking in die gemeenskap as ‘n reuse uitdaging wat sy graag met haar kennis en ondervinding wil deurvoer.

Sy wil ook graag die gemeenskap van Thabazimbi en omliggende gebiede uitnooi om betrokke te raak by die vele projekte en veldtogte wat Kansa op ‘n gereelde basis loods, reeds vir die doel om mense met die nodige kennis toe te rus om die regte lewensstyl keuses te maak vir ‘n gesonder toekoms.

Die kanker waarskuwingstekens vir volwassenes is as volg: Verandering in vratjies of moesies, ongewone verdikking of ‘n verandering in ‘n knop in die bors, nek, armholte of enige ander plek op die liggaam, ongewone bloeding of afskeiding, rowe of seerplekke wat nie genees nie, keelheesheid of hoes wat aanhoudend voorkom, opmerklike veranderinge in uriene- of stoelganguitskeiding en moeite om te sluk of slegte spysvertering. Die kankerwaarskuwingstekens vir kinders is as volg: Wit kol in die swart middelgedeelte van die oog, erge naarheid of braking wat aanhoudend voorkom, ernstige hoofpyne wat herhalend voorkom gedurende die nag of vroeg soggens, baie keer gepaard met braking, teenwoordigheid van swelling of aanhoudende pyn in skelet, gewrigte, rug of bene, verdikking of knoppe op die buik, nek, borskas, bekken of armholtes, onverklaarbare en aanhoudende gewigsverlies, oog- of gesigsveranderings wat skielik voorkom en nie verbeter nie, repeterende of aanhoudende infeksies, koors van ‘n onbekende oorsprong wat herhalend voorkom, onverklaarbare of erge kneusplekke, bloeding of veluitslag en moegheid wat voortduur of opmerklike bleekheid.

Hierdie tekens mag ook aan ander gesondheidsprobleme toegeskryf word, maar indien een of meer van hierdie tekens voortduur, raadpleeg jou geneesheer onverwyld.

Kansa Thabazimbi-tak hou op Vrydag 2 Maart ‘n Shavethon te Absa-bank vanaf 08:00 – 13:00. Almal is welkom om hul hare af te sny of te kom kleur om hulle steun vir Kansa te toon. Die koste beloop R20 of ‘n donasie, wat weer teruggeploeg word ter versterking van Kansa se fondse.

Skakel Sr Adele da Silva by 082 493 2473 of epos haar by adasilva@cansa.org.za vir enige navrae.