Duisende betoog toe ‘Modimolle-monster’ in hof verskyn

Mnr. Johan Kotzé (50)  en nog ’n verdagte het op Vrydag, 13 Januarie, in die landdroshof op Modimolle verskyn in verband met die verkragting op sy vervreemde vrou, me Ina Bonnette, en die moord op haar seun, Conrad Bonnette (19).

Hulle staan voorlopig tereg op 17 aanklagte  waaronder moord, poging tot moord, sewe aanklagtes van verkragting, sameswering tot verkragting en aanranding met die opset om ernstig te beseer.

Nog twee beskuldigdes wat verlede week en gedurende die naweek in Makapanstad by Hammanskraal aangekeer is, het op Maandag, 16 Januarie, in dieselfde hof op dieselfde voorlopige aanklagte verskyn.

Die vier mans verskyn weer op Vrydag, 10 Februarie, in die hof op Modimolle. Die saak is uitgestel vir verdere ondersoek en om geleentheid aan die beskuldigdes te gee om regshulp in te win.

Al vier beskuldigdes word aangehou. Weens die erns van die beweerde misdrywe, is borg nie toegestaan nie. Mnr. Renier van Rooyen, senior staatsaanklaer op Modimolle, het aan die media gesê: “In hierdie stadium word al vier verdagtes op die voorlopige klagtes aangekla.”

Hy het ook na afloop van die hofverrigtinge gesê luidens die klagstaat het Kotze se medebeskuldigdes nie uit dwang aan die beweerde verkragting van die slagoffer deelgeneem (soos wyd deur die media berig is)  nie. “Daar is geen aanduiding van dwang nie.”

Van Rooyen  het aan Die Pos gesê dit is een van die ergste sake wat hy nog in sy loopbaan moes aanhoor. “Dit hou my al vier, vyf dae uit die slaap uit,” het hy gesê.

Duisende vroue van die ANC-vroueliga het met plakkate buite die hof betoog. Van hulle het ook die hofverrigtinge bygewoon met plakkate wat onder meer gelees het: “Troos die slagoffer.”

“Johan Kotzé is gevang en die eer kom die Here toe,” het me. Frances du Preez van Modimolle gesê.

Du Preez is die skoonma van me. Surinda du Preez van Modimolle, wat Kotzé verlede week in ’n klein kafeetjie in die middel van ’n rustige woonbuurt raakgesien het, voor sy uiteindelike inhegtenisname die volgende dag.

Du Preez is na wat verneem word een van verskeie inwoners van Modimolle wat die polisie die aand gebel het nadat hulle Kotze se motor in die dorp gesien het. Nog voordat Du Preez die polisie gebel het, het ’n skoolseun wat gaan draf het, Kotze se voertuig in die straat gesien, is die afgelope week aan Die Pos gesê. Hy het onmiddellik huis toe gehardloop en sy ma het die polisie in kennis gestel.

“Dit is hy! Dit is hy!” was die benoude woorde van me. Surinda du Preez aan haar skoonma toe sy die land se mees gesoekte vermeende misdadiger onverwags in die Duggan’s Kafee in Boshoffstraat, raakgesien het.

“Dit was Dinsdag (10 Januarie) net so voor agtuur die aand,” het sy aan Die Pos gesê. “Ek het sommer gaan ry sodat my kinders aan die slaap kon raak.”

Volgens Du Preez was sy in Maroelastraat, wat voor die kafee in Boshoffstraat verbygaan, onderweg in die rigting van Bosveldsig.

“Ek het by die AP Kerk gestop en toe ry ek voor hom verby. Dit was toe dat ek sien dit was ’n Vrystaat-motor. Ek het in Swartwitpensstraat afgery en omgedraai. Ek wou nie hê hy moes sien ek maak ’n U-draai nie. Toe ek terugdraai, was hy klaar weg. Ek het hom verloor.”

Dit was toe Du Preez terugry in rigting van die bekende Boshoffstraat-kafee toe sy die Toyota Fortuner met die Vrystaat-registrasienommer in ’n donker gedeelte van die straat gesien het, waar dit geparkeer was. Vermoedelik het Kotzé die voertuig daar gelaat en na die winkel gestap. Sy het tot reg voor die winkel gery.

“My hoofligte was nog aan en toe ek voor die winkel stop, toe besef ek eers dat my ligte reg in die kafee inskyn en ek sien toe dit is hy. Toe skrik ek só groot, sit my bakkie in trurat en jaag reguit verby.”

Du Preez het na die huis van haar skoonma, wat naby die kafee geleë is, gejaag. Intussen het sy reeds haar skoonma, me. Frances du Preez, gebel en gesê sy het Kotzé in die winkel gesien.

“Ek het by die huis van ’n polisieman en -vrou gestop en vir hulle vertel wat gebeur het.”

Volgens Du Preez het die polisielede onmiddellik die ondersoekspan in kennis gestel, wat dadelik reageer het. Du Preez snr. het intussen haar seuns, mnre. Anton en Werner du Preez, ingelig dat Kotze in die omgewing gesien is. Hulle het na Kotzé begin soek.

“Ek het vir Anton gaan haal en vir hom gesê Surinda het Kotzé gesien. Toe spring ons in die Cruiser en gaan kyk of ons hom nie kry nie,” het mnr. Werner du Preez, gesê. Mnr. Anton du Preez het op ’n plaas groot geword en die twee het saam spoorgesny. Hulle het Kotze se voertuig in die veld buite die dorp gesien. Hulle het egter nie nader gegaan nie, en het dadelik die polisie in kennis gestel.

“Dit gaan nie vir ons oor die eer nie. Ons is  bly die man is in die tronk”, het mnr. Anton du Preez aan Die Pos gesê. Die familie het ook hulle dank uitgespreek teenoor die polisielede wat hulle gehelp het, asook die ondersoekspan vir hul hulp.

Donker wolke het oor Bela-Bela saamgepak terwyl honderde mense by die Hervormde Kerk op die dorp ingestroom het vir die begrafnis van oud-Nylie Conrad Bonnette (19), wat op Dinsdag, 3 Januarie, koelbloedig doodgeskiet is in ’n tragedie wat die hele land steeds aan die praat het.

Sy ma, me Ina Bonnette (42) is eers Maandag, 9 Januarie, uit die hospitaal ontslaan waar sy ’n operasie ondergaan het om die ernstige beserings wat sy in die gru-aanval opgedoen het, te herstel.

Conrad was in 2010 een van Limpopo se twee top-uitblinkers in die matriekeksamen.

Toe mnr Rex Bonnette, Conrad se pa, me Ina Bonnette, sy sussie Angelique en die res van die Bonnette-familie by die kerk instap, het dit hard begin reën.

Me Bonnette kon beswaarlik beweeg sonder dat ’n mens die pyn op haar gesig gesien het. Sy is na die voorste kerkbanke gehelp waar sy langs Angelique gesit het.

Skaars ’n uur voordat die roudiens begin het, het haar vervreemde man, mnr. Johan Kotze (50), in die landdroshof op Modimolle verskyn op sewentien voorlopige aanklagtes, waaronder moord, poging tot moord, sewe aanklagtes van verkragting, sameswering tot verkragting en aanranding met die opset om ernstig te beseer. Sedert Vrydag het al drie die ander verdagtes wat almal ná een van die grootste mensejagte in die geskiedenis van die Suid-Afrikaanse polisie vasgetrek is, in dieselfde hof verskyn op dieselfde voorlopige aanklagte. — LiN Media/Die Pos