Community

Northam Toyota werknemers maak harte oop met Marakele Marathon

Northam Toyota se deelname aan die afgelope Marakele Marathon se pretdraf, het meer ten doel gehad as net om deel van die dag se aktiwiteite te wees.

Hulle deelname het deel gevorm van ’n interne fondsinsamelingsprojek om een van hulle kollegas, Werner Fourie en sy vrou Cornelia, te help om hulle oudste kind, Minandi, se mediese koste te dek.

Minandi, wat op 29 Maart twee jaar oud sal wees en in Februarie ook ’n ouer sussie geword het, is gedurende Desember 2018 met Sistiese Fibrose (Cystic Fibrosis), ’n ongeneeslike siekte, gediagnoseer.

Die siekte veroorsaak dat ’n abnormale dik slym in die lyf vorm wat aan verskeie organe kleef. Die organe wat hoofsaaklik geaffekteer word is die longe, pankreas, lewer en spysverteringstelsel. Die werking van hierdie organe word verswak deur die slym wat gedwing moet word om te beweeg aangesien die liggaam nie die nodige voedingstowwe opneem nie. Dit beïnvloed die lyer se groei en gesondheid nadelig.

Waar gewone mense asemhaling as vanselfsprekend en maklik aanvaar, raak asemhaling vir CF.-lyers met tyd ’n konstante stryd en, sonder suurstof kan die liggaam nie normaal funksioneer nie.

Meeste mediese skemas bied nie dekking vir “CF” nie en is die meeste van die mediese uitgawes vir hul eie rekening. Hierdie uitgawes het vinnig begin toeneem en die gesin kon nie meer bybly om die mediese uitgawes te dek nie.

Die bestuur en personeel van Northam Toyota, tesame met vriende en familie van die Fourie gesin, het reeds ’n bedrag van R11 500 ingesamel wat vandag, Vrydag 8 Maart, oorbetaal sal word.

Die grootste gedeelte van hierdie bedrag is ingesamel deur werknemers se deelname aan die Marakele Marathon Pretdraf waardeur hulle elkeen ’n bedrag per kilometer wat hulle voltooi het, geborg het.

2019 Marakele Marathon Northam Toyota
’n Gedeelte van die Northam Toyota werkers en vriende wat ten bate van klein Minandi se mediese uitgawes aan die Marakele Marathon Pretloop deelgeneem het. Minandi ly aan die ongeneeslike Sisties Fibrose siekte. Hulle is op die foto van links agter: Dwayne Finn, Jan Moolman, Shaun Finn en David Gouveia. Voor: Elsie Hoffman, Werner Fourie met Minandi in sy arms, Butch Anley en Lenro Anley. Die ander lede van die span was nog besig om hulself aan die 10 km pretloop te toets toe die foto geneem is.

Northam Toyota wil hierdie positiewe en goedhartige gesin graag verder help aangesien die stryd, wat ’n lewenslange stryd is, skaars begin het.

Northam Toyota bied meer inligting op hulle Facebook bladsy aangaande die fondsinsamelingsprojek vir diegene wat sou belangstel om ’n donasie te maak, hoe klein ook al. Maak gerus ’n draai by https://web.facebook.com/NorthamToyotaRSA/ vir meer inligting.