Ertstrokke pla motoriste

Van die ertsvragmotors wag op die skouer van die R510 om erts te laai. Foto: Henk Havenga.

THABAZIMBI – Kort na die dood van twee jongmense naby die Meyermyn twee weke gelede, het heelwat motoriste gekla oor die ertsvragmotors wat die R510 by die ingang na die myn geparkeer en gevare vir die motoriste inhou.

Ertsdraers parkeer reeds die vorige aand en vroeg soggens, soms aan weerskante op die padskouer van die R510 om erts te laai by Meyermyn. Lang rye trokke, amper tot by die Brits-afdraai, staan dan met hul neuse in Thabazimbi se rigting met ligte aan.

Volgens Pierre Loots, ‘n inwoner van Thabazimbi wat gereeld hierdie pad gebruik, veroorsaak hierdie vragmotors geweldige verwarring.

Hoewel party vragmotors verder van die pad parkeer, lyk dit of ander tussenin parkeer en dan gedeeltelik op die pad parkeer is.

As ‘n mens skielik oor die bult kom en hierdie vragmotors van voor af teëkom, met hul ligte aan, is dit uiters verwarrend, sê Loots.

Volgens Henk Havenga, paramedikus, het hy verlede Donderdagoggend vier oproepe ontvang van ontstelde motoriste oor die ertsvragmotors. Hy het ondersoek gaan instel en 44 ertsvragmotors getel. Hy het Kumba-myn en die verkeersafdeling gekontak in verband met die situasie.

Loots sê dit sal maklik wees om die probleem aan te spreek. Die myn het al die nodige toerusting om die sloot langs die pad toe te stoot en die parkering te vergroot. Dis onnodig dat die klein “en goeie” gemeenskap van Thabazimbi enige verdere inwoners onnodig verloor, meen hy.

Volgens ‘n woordvoerder by Kumba se hoofkantoor, Tebello Chabana, is Kumba verbind tot, nie net die veiligheid van sy werknemers nie, maar ook die veiligheid van die gemeenskap.

Volgens hom koop Arcellor Mittal SA die erts en het hulle ‘n kontrakteur aangestel vir die vervoer van die erts. Dus het Kumba, Thabazimbi nie beheer oor die kontrakteurs nie en kan nie kommentaar lewer op hul gedrag nie. Die kwessie moet eerder hanteer word deur die verkeersafdeling.

Die bestuur van die Thabazimbi myn het egter die potensiële gevaar wat die ertsdraers inhou besef en is tans besig om maniere te vind, saam met die verkeersdepartement, om die risiko’s by die ingang van die Meyermyn te probeer beperk.

Volgens Chabana is die ingang na Meyermyn verbreed, nuwe padtekens aangebring om motoriste te waarsku, nuwe ligte is aangebring en die verkeersdepartement het ingestem om maatstawwe in te stel om beter spoedbeheer toe te pas.

Daar is onderhandel met die verkeersdepartement om die parkeerarea te vergroot sodat al die ertsdraers binne die laai-area kan parkeer. Mynsekuriteit help nou toesien dat vragmotors nie meer by die pad parkeer nie.

Hennie Pauw