Plaaslike sake-eienaars kan groot wen

Plaaslike sake-eienaars kan nou meeding om ‘n gesogte titel en hope kontant in Sanlam/Business Partners se Entrepreneur van die Jaar-kompetisie.  Die algehele wenner kry R100 000 kontant en word as Suid-Afrika se Entrepreneur van die Jaar gekroon.

Slegs eienaars van ontluikende, klein- en mediumsake-ondernemings mag deelneem.

Dié kompetisie is in 1989 begin om erkenning te gee aan die visie, vernuwing, deursettingsvermoë, dryfkrag en toewyding van dié individue wat suksesvolle klein- en mediumsake bedryf.

Vanjaar hou ‘n dramatiese verandering vir die reeds invloedryke toekennings in, aangesien Sanlam sy gewig hierby ingegooi het en dit nou ook vir alle sake-eienaars in Suid-Afrika oopgestel is.

Daar is drie kategorieë: Ontluikende Entrepreneurs (besighede minder as drie jaar oud), Kleinsake-Entrepreneurs (omset tot en met R20 miljoen per jaar) en Mediumsake-Entrepreneurs (omset meer as R20 miljoen, maar minder as R200 miljoen).

Elke kategoriewenner sal R20 000 ontvang.  Die algehele wenner sal, afgesien van R100 000 kontant, die geleentheid kry om ‘n internasionale konferensie of handelskou by te woon sowel as uitgebreide blootstelling in die openbare domein.  Laasgenoemde behoort verkope ‘n hupstoot te gee.

Met dié projek gaan daar ook vanjaar landwyd ‘n reeks uitgebreide seminare en werkswinkels aangebied word wat op klein en mediumsake (SME’s) fokus.  Dit bereik ‘n hoogtepunt in Oktober met die aanbieding van ‘n SME-konferensie waar besluitnemers hul opinie kan lug oor die omgewing waarbinne sake-eienaars opereer en oor die uitdagings wat hulle moet trotseer.

Die seminare, werkswinkels en konferensie sal fokus op finansiële beplanning, besigheidsgeleenthede en -advies, toegang tot finansies, inligting oor die ontwikkeling op regsgebied en veranderinge aan die regulatoriese omgewing.

Om ‘n inskrywingsvorm te kry of besonderhede oor die kompetisie, besoek eoy@businesspartners.co.za of bel vir Vick Nish op (011) 713-6600.