THABAZIMBI – Bosveld Akademie se gholfdag verlede Saterdag was ‘n groot sukses. Dit was ‘n volle Boere Krabbel (American Scramble) en 15 vierballe het pryse gekry.
Die beste tellings was die van Le Roux Booysen, M Botha, J Meyer en L de Bruin wat met 58 op ‘n uittel wen. Ook op 58 was Ettiene le Roux, Johan Barnard, Nita Barnard en Lindie Bredenkamp. Nog ‘n 58 was die van N Lotter, A Lotter, Andre en Johan (sonder van).
Daar is nou ook ‘n aparte rook gebied in die kroeg ingerig. Dit is nou nie agter tralies nie maar ‘n netjiese glas afskorting wat deur die toedoen van Peter Badenhorst geborg is deur Swallow Fork Estates. Ek weet nie wie die grootste dankie moet sê nie, die rokers of die nie-rokers nie. Namens almal egter, baie dankie vir die hok.
Daar is nou weer ‘n nuwe voorgee stelsel wat deur ‘n nuwe groep bestuur gaan word. Daar is reeds ‘n nuwe raak-skerm rekenaar in die klub geïnstalleer wat in die toekoms gereeld deur spelers gebruik sal moet word. Nuwe voorgee-kaarte sal ook binnekort aan almal uitgereik word. Lede moet asseblief maar nou nog hulle bestaande kaarte gebruik om te swiep voordat jy speel en ook as jy klaar is.
Vrydag 2 Julie is dit weer Interaksie Gholf en Saterdag 3 Julie is dit die gereelde maandelikse Slagspel. Donderdag 8 Julie speel die Sages op Naboomspruit. Saterdag 10 Julie is ‘n moontlike HMT Mining borgdag. Vrydag 16 en Saterdag 17 Julie is dit die Slag van die Bosveld (Battle of the Buschveld) wat deur die dames gereël word. Saterdag 17 Julie speel die manne ook liga op Amandelbult. Saterdag 24 Julie gaan daar moontlik ‘n driehoekige byeenkoms tussen Thabazimbi, Amandelbult en Swartklip gespeel word. Nog ‘n borgdag is op Saterdag 31 Julie naamlik die Tjokkerdag wat ten bate van die graad R klas van Laerkool Thabazimbi is.
