Kierieklapper Kunstefees 2010

Die Mutual & Federal Agri Kierieklapper Kunstefees word elke jaar gehou in Mokopane (Oud Potgietersrus), Limpopo Provinsie op HS Piet Potgieter se skougronde.

Mokopane en Limpopo kan gerus die jaar hul vere reg skud vir ‘n uithaler Kierieklapper Kunstefees, aangesien dit die Fees se 10de bestaansjaar sal wees.

Die Kierieklapper Kunstefees (KKKF) is ‘n inisiatief van die Dienssentrum vir Bejaardes van Potgietersrus, waarvan die inkomste aangewend word vir die kwalitatiewe versorging van die bejaardes reg deur die jaar.

Dagboek solank 5-7 Augustus 2010, bring die gesin en word vermaak deur kunstenaars uit die boonste rakke!

Vanjaar wil die organiseerders probeer om ‘n wêreldrekord op te stel wat opgeneem kan word in die “Guinness Book of Records”.

Die mikpunt is om op Saterdag, die 7de Augustus 2010, vanaf 10:15 die oggend, ‘n minimum van 300 persone gelyktydig te laat brei op die feesterrein. Uit die aard van die saak gaan die TV nie belangstel om ‘n groot groep vroue te kom afneem nie, maar as ons die eerste rugbyspanne van die skole en dorpe, die stoeispan van die dorp, die lede van die Distrik Landbou Unies (DLU’s) of die leraars van elke dorp in spanne kan laat brei, gaan dit opskudding veroorsaak, en dit is mos wat ons wil doen. (Privaat onderrig in brei kan verskaf word.)

Die Soetdoringstreek van die Vroue Landbou Unie wil graag hierby betrokke raak, en vat dus hande met die organiseerders van die Kierieklapperfees hierin.

Ons wil vra dat elkeen wat kan, begin blokke brei, met die oog daarop om soveel as moontlik komberse te maak ten bate van die bejaardes. Dit maak nie saak van watter dikte of kleur breidraad dit gebrei word nie, die verskillende soorte sal uiteindelik saam gesorteer word om dit sinvol te maak. Blokke kan ook veelkleurig wees. Die standaard patroon wat gebruik moet word, word hieronder gepubliseer.

Asseblief, moenie ledig voor die TV sit, of verveeld as passasier in ‘n motor vêr afstande ry nie. Hierdie breiwerkie is klein en kompak, alles word in reksteek gebrei, dus hoef jy nie te konsentreer of te tel nie, en jy sal verbaas wees oor hoeveel blokke jy kan brei. Die beplanning is dat ons gemiddeld 80 blokke per kombers gaan benodig. Begin asseblief sommer dadelik.

Indien jy glad nie kan of wil brei nie, skenk asseblief vir ons daardie breidraad en breinaalde wat so ongebruik in jou kas rondlê, sodat iemand anders, wat die tyd, maar nie die breidraad het nie, solank kan help. Voltooide blokke sal solank vasgewerk word, sodat soveel moontlik komberse reeds met die fees beskikbaar is.

Kom ondersteun ons asseblief hierin. Enige donasies kan by die dienssentrum in Mokopane afgegee word.

Kontakpersone: Mariaan – 015 491 3129, Elaine – 082 975 6095 en Joan Erasmus – 082 782 3766 / 015-491 1124 erasmuspl@mweb.co.za

Meer besonderhede in verband met die Kierieklapper Kunstefees kan gevind word by: http://www.klappertjie.co.za/

Breipatroon:
Heg 1 steek aan.
1e ry:       Vermeerder in hierdie steek (2steke)
2de ry:      Glip 1 steek, vermeerder in 2de steek (3 steke)
3de ry:      Glip 1 steek, vermeerder in tweede steek, brei tot aan die einde van die ry.
Herhaal die 3de ry, totdat daar 40 steke op die breinaald is.
Volgende ry: Glip 1 steek, brei volgende 2 steke saam, brei tot aan die einde van die ry.
Herhaal hierdie ry tot 2 steke oor is.
Brei 2 steke tesame, en trek breidraad deur die laaste steek om af te heg.