Vir inwoners van die Bosveld was die watervoorsiening aan Medupi en ander ontwikkelings in die Lephalale-Steenbokpanomgewing nog altyd ‘n kwelpunt.
Dit het egter later geblyk dat Eskom die watertekort nie by hul aanvanklike beramings in ag geneem het nie. Die Departement van Waterwese, verantwoordelik vir die voorsiening van water aan nasionale projekte soos Medupi, het toe begin met die beplanning van die pyplyn wat water aan Medupi en Steenbokpan sal voorsien. Daar is egter steeds diegene wat die akkuraatheid van berekenings bevraagteken.
Die Mokolo Krokodil-Wes Watervoorsienings projek (MKWWP), wat ten doel het om die water vanaf die Krokodilrivier af te voorsien, bestaan uit twee fases. Fase 1 omvat die oordragskema vanaf Mokolodam parallel met die bestaande pyplyn na Matimba-Grootegeluk en dan verder na Medupi.
Fase 2 behels die oordrag van water vanaf die Krokodilrivier wes na Lephalale (Steenbokpan) en die verwydering van die bottelnek op die bestaande pyplyn vanaf Mokolodam na Lephalale.
Daar is etlike alternatiewe op ‘n kaart aangedui vir die plasing van die pyplyn vanaf Vliegepoort na Steenbokpan. Verlede jaar het die insluit van ‘n tweede alternatief, wat nie die bestaande infrasturktuur volg nie, groot kontroversie veroorsaak onder grondeienaars, toe dit geblyk het dat die plasing moontlik verander het om plasing van Eskom se beplande ashoop vir hul beplande derde en vierde kragstasies in Steenbokpan voorsiening te maak.
Grondeienaars in Steenbokpan leef intussen saam met heelwat onsekerheid. Toe toetse oor die afgelope twee weke begin is om vas te stel waar sand vir die bou van die pyplyn gemyn kan word, is dit egter net langs een alternatief getoets, naamlik die een langs die bestaande Steenbokpan-Soutpanpad, die eerste moontlike plasing van die pyplyn. Grondeienaars vra hulleself af of dit beteken dat Eskom hul ashoop skuif en of die bou van verdere kragstasies nou finaal van die baan is.
Die pyplyn kan nou moontlik loop langs dieselfde pad waarlangs ‘n Australiese mynmaatskappy hul steenkool oor ‘n periode van vyf jaar wil vervoer.
Die omgewingsimpakverslag is tans beskikbaar vir kommentaar vanaf 17 Junie tot 27 Julie in Lephalale, Steenbokpan en Thabazimbi of op die webwerf http://www.dwa.gov.za/projects.asp
Openbare vergaderings word weereens deur konsultante gehou op 29 Junie in die Lephalale Mogol konferensiesaal vanaf 9 vm en by Ashanti konferensielokaal vanaf 3nm.
Navrae kan gerig word aan Salomon Pienaar by 011-7811730
