Jong Kommuniste word uitgenooi om wit plakkerskamp te besoek

AfriForum Jeug en Solidariteit Helpende Hand het vandag ’n uitnodiging aan die leiers van die Jong Kommunisteliga (YCL) gerig om saam met hulle ’n wit plakkerskamp te besoek.

Hierdie uitnodiging is gerig in die lig van die onlangse uitspraak van die YCL dat regstellende aksie en swart ekonomiese bemagtiging sal voortduur tot die dag “wanneer wit jongmense net so min soos hul swart tydgenote het”. AfriForum Jeug het ook onlangs ’n gesprek met die YCL gevoer waartydens regstellende aksie en die verskynsel van wit armoede in Suid-Afrika met hulle bespreek is.

Die doel van die besoek aan die wit plakkerskamp is om die erns van wit armoede aan die YCL te wys en samesprekings te voer oor wat gedoen kan word om hierdie groeiende probleem hok te slaan.

Die voormalige Umsobomvu Youth Fund (UYF) het in April 2009 ’n studie gedoen om die kernuitdagings van arm wittes in Suid-Afrika te identifiseer. Dié studie is egter nog nie formeel bekendgestel nie, maar is aan Helpende Hand beskikbaargestel.

“Volgens die studie geniet wit gemeenskappe nie gelyke behandeling met die uitreiking van gestremdheids- en kindertoelaes nie en regstellende aksie bewerkstellig net verdere agteruitgang van hierdie gemeenskappe,” volgens dr. Danie Langer, Uitvoerende Direkteur van Helpende Hand.
“Die studie toon duidelik aan dat wit Suid-Afrikaners meer en meer gemarginaliseer word en dat regeringsprogramme ruimte moet bied vir die ontwikkeling en ondersteuning van arm wittes,” sê Langer.

Bekende demograaf prof. Flip Smit het bevind dat ongeveer 600 000 wit Suid-Afrikaners besig is om in armoede te versink.

“Regeringsamptenare is self nie eers bewus van wit armoede nie en die regering doen geen moeite om wit mense by die toekoms van Suid-Afrika in te sluit nie. Wittes moet eenvoudig deel vorm van die regering se plan om armoede te verlig.

Die regering gebruik egter ras om ’n wig tussen mense in te dryf,” sê Langer. AfriForum Jeug se nasionale voorsitter, Ernst Roets, het gesê dat AfriForum Jeug geskok is oor hierdie uitlating van die YCL. “Ons weet dat die YCL baie klem op opheffing en die verligting van armoede plaas. Ons was egter onder die indruk dat die YCL, anders as die ANC-jeugliga, nie ’n rassistiese organisasie is nie. Die klem van die ekonomiese beleid moet daarop wees om armes op te hef en nie om almal arm te maak nie.”

Roets het bygevoeg dat armoede nie op grond van ras aangepak kan word nie. “Ons moet op sosio-ekonomiese omstandighede fokus en die punt bereik waar jongmense van regstellende aksie vrygestel kan word.”