VLU Bosveldstreek – 29ste Konferensie goed ondersteun

“Vrou in Volle Blom” – Die tema waarom die jaar se aktiwiteite gedraai het – was duidelik sigbaar  tydens die Bosveldstreek se 29ste Konferensie wat vanjaar deur die VLU Strewe as gasvrou-tak op Setaria aangebied is.

Self die Bybelse teks waarmee Annia van Deventer die konferensie geopen het, is geneem uit die Spreuke van Salamo wat deeglik kennis hiervan gedra het toe hy gesê het, “ʼn Vrou kan nie blom sonder God nie”.

Die verwelkoming van die talle VLU lede, gaste en eregaste, wat vanaf Beauty, anderkant Ellisras tot verby Thabazimbi tot in Koedoeskop, Northam en Dwaalboom strek, is deur die Bosveldstreekvoorsitter, Riana Oosthuizen gedoen terwyl die VLU Noord president, Ria Strydom die konferensie amptelik geopen het.

Soos gebruiklik by elke konferensie het die Ilna Schutte namens die gasvroutak die huldeblykkerse ter herrinnering aan die ontslape lede aangesteek.

Die Tema van die Jaar het veral weerklank gevind toe die gasspreker, Gerrie Jordaan die gehoor telkens laat skaterlag het met haar spitsvondigheid. Die humor daar gelaat, het sy ʼn paar gedagtes gelos om oor na te dink.

Ten eerste: ʼn Blom word ʼn vrug, “wat se vrugte dra jy?”.

Die saad spruit uit die vrug voort, saadjies wat saamgroei met blomme wat mooi lyk, lekker en gesond ruik, en weer vrugte dra wat jou versadig; en ten laaste dat, “dit wat jy in die proses verloor het nie werklik saak maak nie, al wat saak maak is dit wat jy behou het.”

Tydens die konferensies word ruim geleentheid gebied aan lede wat langdiensknopies ontvang. So het Mari Meintjies haar 30-jaar knopie en Petra Ortner haar 20-jaar knopie ontvang terwyl verskeie ander lede hulle vyf- en tien-jaarknopies ook ontvang het.

Een van die ander hoogtepunte is telkens die prysuitdeling waar lede erkenning ontvang vir hulle harde werk gedurende die jaarlikse projekte. Hierdie projekte sluit in van fotografie en kuns tot borduurwerk en gebak op streek, provinsiale asook nasionale vlak.

Bosvelstreek se Top-tak van die jaar was Beauty. Nie alleen was hulle die top-tak nie maar is die Toplid van die Jaar met die meeste pryswennende artikels, Rina Lamprecht, ook lid van Beauty VLU.

Individuele toekennings het gegaan aan:
Lid met die hoogste totaal in SAVLU artikels – Rina Lamprecht
Lid met die hoogste totaal in Provinsiale artikels – Altie van der Linde en Anita Swart
Lid met hoogste totaal in Streek artikels – Alta Eloff
Lid met hoogste totaal op Konferense asook Lid met die mees verdienstelike artikel – Altie van der Linde.

Die VLU Bosveldstreek dek ʼn groot gebied en die VLU takke betrokke hierby se lede is inwoners van verskeie dorpe en omgewings naamlik Tom Burke, Baltimore, Swartwater, Tolwe, Ellisras, Steenbokpan, Vaalwater, Northam, Thabazimbi, Sentrum,en so ver as Dwaalboom en Koedoeskop.

Tydens die konferensie is Riana Oosthuizen as Bosveldstreek voorsitter herverkies en Denise Barnard is verkies as vise-voorsitter vir Hardekoolkring en is ook gekoöpteer as beoordelaarsameroeper.

Die VLU lede en gaste het lekker saam gekuier en gesmul aan die heerlike geregte wat deur die gasvrou-tak voorgesit is.

Opmerkings oor die dag het dan ook ingesluit:
“Was ʼn ongelooflike lekker dag.” – “Kos uit die boeke en die spreker Mej Gerrie Jordaan het ons laat skater lag.” – “Baie dankie vir ʼn baie lekker konferensie. Smaaklike ete en ‘stunning’ gas spreker.”

Almal is uiteen, begeester deur die sukses van die konferensie, om vanjaar se tema van die jaar met herneude ywer aan te pak.