Handsak teruggevind

Groot verligting is te bespeur op Susan (links) se gesig vir die terugvinding waar sy by Annatjie (middel) en Ester (regs) staan.

THABAZIMBI – ‘n Doodgewone oggend het ontaard in ‘n senutergende ondervinding vir ‘n plaaslike inwoner. Susan Prinsloo, was op Donderdag oggend 24 Junie oppad werk toe en het met al die geskarrel met haar twee hondjies haar handsak ingedagte op haar kattebak neergesit en gery.

Toe sy by Die Kwêvoël aankom, waar sy deeltyds werksaam is, het sy met ‘n skok besef wat sy gedoen het. Inderhaas het sy teruggery huistoe, maar die handsak was nerens te vinde nie. Daar is vinnig gedink en Thaba Stereo is geskakel om uit te saai dat haar handsak verlore is. ‘n Vrou se hele lewe is mos in daardie sak wat sy oral ronddra. Om net te dink aan al die beslommernis om kaarte, id dokumente en bestuurslisensies te vervang is genoeg om enigeen mismoedig te laat voel.

Binne ‘n kwessie van ‘n halfuur het sy egter die goeie nuus ontvang dat iemand haar handsak gevind het. Annatjie Breedt se huishulp, Ester Mathlabane, het die hele episode sien gebeur en die handsak na haar werkgewer gebring om te kyk of sy kan help. Annatjie wou nog in die handsak kyk toe sy die berig oor die radio hoor, en skakel toe dadelik.

Gelukkig het hierdie episode ‘n goeie einde gehad en is dit wonderlik om te weet dat die gemeenskap van Thabazimbi so behulpsaam en eerlik is.