Northam Plats (Rhinos) weereens Waterberg rugby kampioene

Die trotse eerste span manne van die Rhino’s wat as kampioene uit die Waterberg finale van die rugbylige getree het op Vrydag 18 Julie toe hulle Vaalwater en 15-6 gewen het.

WATERBERG LIGA – Vrydagaand, 18 Junie was daar vuurwarm rugby op ‘n yskoue Northam Plats rugby veld gespeel toe die Waterberg finale daar plaasgevind het. In die proses is daar verskeie rekords gebreek en verbeter. Eerstens was dit die eerste keer dat Vaalwater in ‘n finaal gespeel het in die eerste liga.

Thabazimbi se tweede span het vir die sesde agtereenvolgende jaar in die finaal gespeel wat ‘n uitstekende prestasie is. Northam is die eerste rugbyklub wat die liga twee jaar agtermekaar kon wen met albei spanne.

Die eerste span wedstryd was soos verwag, kliphard en die tweedes het mekaar byna met geweld aangevat, want geen genade is gevra of gegee nie. Die wedstryd was tot in beserings tyd steeds in die weegskaal omdat albei spanne wou wen, gelukkig het JP Jacobs, senter van die Rhinos deurgedraf vir die drie wat die spyker in Vaalwater se doodskis geslaan het.

Die Rhinos se gevaarlike agterlyn kon nie aan die gang kom nie en daar moet Vaalwater se verdediging die krediet kry net soos die Rhinos se verdediging wat uitstaande was. Mens moet dalk ook net noem dat die Rhinos se skoppers hulle skopskoene iewers langs die pad verloor het anders kon die telling veel anders uitgedraai het.

Rhinos druk 3 drieë en Vaalwater slaag met 2 strafskoppe. Puntemakers vir Rhinos was Steven Coetsee met 1 drie en JP Jacobs 2 drieë. Vaalwater slaag met Andre Beer wat 2 strafskoppe aangeteken het. Rhinos wen 15 -6.

Die Rhinos se tweede span het redelik maklik gewen teen ‘n begeesterde Thabazimbi span. Thabazimbi het soos tiere verdedig, maar op die ou einde was die Rhinos net te goed, Rhinos wen die wedstryd 20-0.

Gerhard Cloete losskakel van Rhinos het vir nog ‘n rekord gesorg deur al die Rhinos se punte aan te teken in ‘n finaal. Punte vir Rhinos 2 drieë,2 doelskoppe en 2 strafskoppe.

As daar ooit twyfel was dat rugby in die Bosveld kliphard is, is dit Vrydag uit die weg geruim.