Metaalsihoeëtskiet geleentheid

THABAZIMBI – Vir die eerste keer het Thabazimbieërs, wat gelisensieërde wapens besit, die geleentheid om ook hulle vernuf te wys, hetsy dit ‘n windbuks, .22 of ‘n .303 is. Die Gauteng Metaalsilhoeëtskietvereniging wat in samewerking is met SA Jagtersvereniging van Thabazimbi bied vir die inwoners van Thabazimbi die geleentheid om lood, kruit en ysterteikens te skiet.

Dit vind plaas by die Koos Cronjé skietbaan op Saterdag 3 Julie. Die toegang is gratis en sal afskop 9:00 vir 9:30. Toeskouers en deelnemers sal hul eie skadu en versersings moet saambring na die pret dag, maar daar sal wel ‘n kontantkroeg beskikbaar wees.

Daar kan in verskeie afdeling deelgeneem word, maar die skietdag gaan hoofsaaklik fokus op items wat met gewone vuurwapens geskiet kan word. In die .22 handwapen-afdelings word die diere op 25m, 50m, 75m en 100m geplaas. In die grootkaliber- en handwapenafdelings op 50m, 100m, 150m en 200m geplaas. Grootkaliber geweerteikens se afstande wissel van 200m tot 500m.

Een punt word toegeken as ’n teiken van sy staanplek afgeskiet of omgeskiet word. Raakskote wat die teiken tref, maar nie laat omval nie, tel nie. Vir elke dier is daar 10 plate wat afgeskiet moet word, wat dan ‘n groot totaal van 40 gee.

Skuts van die GMSSV sal hulle spesialis-vuurwapens en unieke tegnieke demonstreer. Deelnemers sal dan ook die kans gegun word om na die teikens te skiet. Metaalsilhoeëtskiet is ’n taamlike onbekende sportsoort wat vroeg in die vorige eeu in Mexiko ontstaan het. Hulle het eers na lewende diere geskiet, maar het toe later na metaal (afbeeldings) wat in hoender, varke, kalkoene en ramme se vorms gemaak is, geskiet.

Die sport het in die 1970’s na die Verenigde State oorgewaai en in 1982 in Suid-Afrika posgevat. Suid-Afrika was in 1992 een van die stigterslede van IMSSU – die internasionale liggaam wat die sport reguleer en waarvan 21 lande tans lede is.

Belangstellendes kan vir Maryke kontak by 084 909 4091