Vyf redes om in ’n uittree-annuïteit te belê

Promosie Artikel

As jy voor einde Februarie in ’n uittree-annuïteit (UA) belê, kan jy nie net belastingvoordele kry nie, maar ook gemoedsrus hê in die wete dat jy jou aftreespaarfondse met ’n baie gewilde belegging aangevul het, sê Sanlam-adviseur Fanie Venter van Thabazimbi.

Hy voer vyf redes aan om in ’n UA te belê:

1. Voorbereiding vir aftrede deur jou spaargeld ’n hupstoot te gee

Min mense spaar genoeg in ’n werkgewer se aftreefonds om gemaklik te kan aftree. ’n Uittree-annuïteit kan jou ander aftreespaarfondse aanvul sodat jy jou lewenstandaard tydens aftrede kan voortsit. Onthou, wanneer jy werk, gebruik jy jou salaris om mediese fondsbydraes en ander uitgawes te dek. Wanneer jy aftree, sal jy waarskynlik nog steeds baie van hierdie uitgawes moet befonds, maar jy sal nie meer dieselfde inkomste verdien nie. ’n UA kan jou help om hierdie uitgawes te dek.

2. Die krag van saamgestelde rente

As jy oor ’n lang tydperk spaar, verdien jou geld rente. Saamgestelde rente is die rente wat jy sal verdien op die rente wat in jou UA herbelê is. As jy byvoorbeeld oor ’n tydperk van 20 jaar in ’n UA spaar, sal ’n groot persentasie van jou uiteindelike spaarfonds dus te danke wees aan saamgestelde groei op jou belegging.

UA’s is bedoel om langtermynspaarplanne te wees, wat jou ook in staat stel om markskommelinge uit te stryk en die langtermynvoordele van ’n belegging te kry.

3. Belastingvoordele

As jy voor die einde van die belastingjaar in Februarie ’n UA aangaan, sal jy minder inkomstebelasting betaal omdat UA’s belastingvriendelik is. Jou UA-bydraes is belastingaftrekbaar tot ’n voorgeskrewe maksimum van jou belasbare inkomste per jaar. Gestel jy betaal ’n marginale belastingkoers van 40% en jy belê R100 in ’n UA, kan jy in werklikheid R40 van daardie bedrag van die SA Inkomstediens terugkry.

 

Afgesien van die feit dat jou bydrae aftrekbaar is, sal die beleggingsopbrengs op die UA – dit is die inkomste en dividende op jou belegging – ook nie belas word nie.

4. Spaardissipline

Jy kan eers op ouderdom 55 toegang kry tot jou UA. Dit verhoed dat jy te vroeg geld uit jou UA onttrek.

5. Addisionele voordele

As dit ooit gebeur dat jy finansieel in die knyp raak, word jou UA teen krediteure beskerm.

UA’s gee jou ook toegang tot ’n verskeidenheid fondse en bateklasse en jy kan jou onderliggende beleggings kies.

Fanie sê jy behoort met ’n gekwalifiseerde en kundige finansiële adviseur te gesels om die beste advies oor UA’s as beleggingsoplossings te kry.

Kontak Fanie Venter op 014 772 2000 of 083 979 6239 vir meer inligting.