Nuwe Kansa-koördineerder vir Thaba

Die passievolle Sr Adele da Silva is die nuwe Kansa-koördineerder van Thabazimbi.

THABAZIMBI – ‘n Splinternuwe Kansa-kantoor te Spitskop nommer 346, Dertiendelaan het vandeesmaand sy deure vir die gemeenskap geopen.

Suster Adele da Silva, al die pad vanaf Randfontein, is aan die stuur van dié kantoor en sien baie uit daarna om die gemeenskap van Thabazimbi met haar kundigheid en passie te bedien.

Kansa bied verskeie dienste aan, onder andere Bewustheidsprogramme met die klem op die voorkoming van Kanker waar Sr Adele klein groepe, skole en selfs kleuterskole besoek om hierdie lewensbelangrike inligting deur te gee. Ander dienste is: Mediese toerusting wat vir elke persoon wat gediagnoseer is met kanker gratis beskikbaar is, gratis inligting en berading, tuisbesoeke en pynkontrole, stoma advies en raad vir diegene wat wel stoma sakkies het.

Sy wil graag ‘n ondersteuningsgroep begin, maar benodig vrywilligers om te help. Daar word ‘n vrywilligers vergadering beplan vir 21 Februarie om 10:00 by die nuwe kantoor te Spitskop nommer 346. Hou gerus die Kwêvoël dop vir inligting aangaande die projekte wat vir 2012 in die pyplyn is.

Sr Adele versoek graag elke persoon wat met kanker gediagnoseer is, om haar te skakel om by Kansa te registreer vir die vele gratis dienste asook vir bystand gedurende die tyd wat voorlê wanneer ‘n kankerpasiënt in remissie is.

Die gemeenskap kan Sr Adele vanaf 1 Maart vir papsmere by die kliniek bespreek. Die eerste 200 kliënte sal dit gratis ontvang. Besprekings kan per e-pos gedoen word by adasilva@cansa.org.za of kontak haar by 0824932473.

Kansa is volkome aangewese op die publiek se onderskraging en finansiële ondersteuning. Donasies gee vir hulle die vryheid om kankerpasiënte se lyding te verlig en om ‘n verskil te maak in ander se lewens. Sy bedank hiermee vir Gawie Vorster van  NCP vir hul bydrae met die oprig van die nuwe Kansa-kliniek in Thabazimbi.