‘Uitwissing van renoster sal nie gebeur’

Kaapstad – Dit gaan nie gebeur dat die renosterspesie uitsterf terwyl ons die lot van die renosters in ons hande hou nie, het adv. Johnny de Lange, voorsitter van die portefeuljekomitee oor water en omgewingsake, gesê.

Openbare verhore oor hoe renosterstropery stopgesit kan word, word tans in die parlement gehou. Landbou.com berig 333 renosters is in 2010 en 448 verlede jaar gestroop. Vanjaar trek dit al by 28.

Die portefeuljekomitee het 14 skriftelike voorleggings oor die kwessie gekry.

Fundisile Mketeni, adjunk-direkteurgeneraal gemoeid met biodiversiteit en bewaring by die departement van water en omgewingsake, het gesê hulle sukkel om inligting oor die opgegaarde voorraad renosterhorings te kry.

’n Amnestietydperk sal waarskynlik ingestel moet word sodat mense die aantal horings wat in hul besit is, bekend kan maak.

-Media24