2012 is Jaar vir Bejaardes

Die passievolle, diensbare Marie Steenekamp is pas aangestel as die nuwe Bestuurder van Huis Immergroen. Saam met haar op die foto staan Sr Marianne Klopper van Huis Tambotie.

THABAZIMBI – Die bekende Marie Steenekamp, wat reeds jare lank diep spore trap in gemeenskapsake, is pas aangestel as Huis Immergroen se nuwe Bestuurder.

Marie het op Donderdag 2 Februarie die Kwêvoël oorgenooi om te gesels oor dit wat haar die naaste aan die hart lê, naamlik die bejaardes van Thabazimbi.

Sy doen ‘n baie ernstige beroep op die hele Bosveldstreek-gemeenskap, so ver as Nylstroom, Ellisras, Leeupoort, Rooiberg, Koedoeskop, Northam, Swartklip en al die ander omliggende gemeenskappe om betrokke te raak by die bejaardes. “Kom ons maak 2012 dié jaar vir ons bejaardes. Ryk uit na hulle. Dis ons mense: Pa’s, Ma’s, Oumas en Oupas. Wat het hulle nie alles vir ons opgeoffer nie? Nou is dit ons beurt om vir hulle te wys hoe dankbaar ons is, vir alles wat hulle baie keer, onder moeilike omstandighede, vermag het. Kom gesels met hulle, deel drukkies uit, bring vir hulle eetgoedjies. Raak betrokke.” Het Marie driftig gesels. Sy is ook die Koördineerder van Huis Tambotie en is saam met Dr Tinus Benade die Verteenwoordigers van die NG Kerk, op die Bosveld Oord Bejaarde Trust en is in haar hoedanigheid ook die Koördineerder van die SA Bloedoortappings Dienste Thabazimbi.

Sy bedank die gemeenskap, besighede en enkelinge vir alles wat hulle alreeds gedoen het. “Ons kan egter nog meer doen. More, oormore, is dit ons beurt om te wees waar hulle tans is.”

Vir meer inligting, kontak Marie by 072 252 0770 of 014 772 1530.