Plaaslike hengelaar wen “All Transvaal”

Nicolene Heydenrych, wenner van die “All Transvaal” Hengelkompetisie saam met haar suster Martie Murray (derdeplek) het ses medaljes tydens dié hengelkompetisie verower.

VAALDAM – Die “All Transvaal” se jaarlikse kompetisie waarby die beste hengelaars in die land kompeteer, het op Saterdag 21 Januarie vanaf 06:00 – 15:00 te Vaaldam plaasgevind.

Die provinsies wat deelgeneem het was Noordwes, Limpopo, Noordwes Sentraal, Mpumalanga, Gauteng en Gauteng Sentraal. Elke provinsie het ‘n span van agt dames ingeskryf.

Nicolene Heydenrych en haar suster, Martie Murray van Thabazimbi Hengelklub was onder Noordwes ingeskryf. Nicolene verower die meeste punte en weeg ook die swaarste sak in, wat haar die kampioen van die dag maak. Sy wen “All Transvaal” en word ook as die Victrix Ludorum aangewys. Martie behaal ‘n stewige derdeplek in die kompetisie. Danksy dié twee dames se uitmuntende prestasies, verower Noordwes die goue medalje vir die dag. Tussen die twee dames bring hulle ses medaljes huis toe. Die klub en gemeenskap wens hulle geluk met hierdie puik prestasies.

Hulle gaan gedurende volgende week, 13 – 19 Februarie, aan die Dames SA Kampioenskappe te Bloemhofdam deelneem.