‘Niks gaan haar onderkry nie’

Me. Ina Bonnette vee trane uit haar oë by haar seun Conrad se begrafnis. Foto: Herman Steyn

“Dit gaan werklik goed met ons.”

So sê me. Ina Bonnette, wat die afgelope paar weke landwyd in die nuus was ná haar wrede marteling en verkragting en die moord op haar seun Conrad (19).

“Sê vir Die Pos se lesers dit gaan goed met ons. Ons vat elke dag en werk dit deur,” het Bonnette op Woensdag, 8 Februarie, aan Die Pos gesê.

Bonnette het aan Die Pos bevestig sy sal vandag, 10 Februarie, saam met talle van haar ondersteuners, by die hof op Modimolle wees waar haar beweerde aanvallers se saak weer voorkom. Hulle beoog om almal pienk klere te dra.

Bonnette het ook wéér dankie gesê vir die ondersteuning en liefde van die mense in die Waterberg-gemeenskap wat vir haar, haar dogter Angelique en haar eks-man, mnr. Rex Bonnette, deur dié moeilike tyd gedra het.

Sy is reeds terug by die werk nadat sy weke lank moes herstel van die beserings wat sy in die gru-voorval opgedoen het.

Sy voel só sterk dat sy eersdaags by ’n musiekdag by San Rock Lodge buite Modimolle ’n motiveringstoespraak gaan lewer, het ’n goeie vriendin van Bonnette, me. Elize Coetzer, gesê.

“Ina is baie sterk. Niks gaan haar onderkry nie.”

“Die musiekdag word deur die gemeenskap gehou om geld in te samel vir Bonnette se mediese onkoste. Sy móét nog verskeie operasies ondergaan om die skade wat sy in die aanval opgedoen het, te herstel,” het sy gesê.

Dit gaan ’n musiekkonsert wees waar die Nylstroom-mannekoor onder meer sal optree. Voor die konsert sal daar eers ’n motorfiets-optog deur die dorp wees ter ondersteuning van haar. Die verrigtinge begin om elfuur.

Toegangsgeld is R80 vir volwassenes en R50 vir kinders. Die publiek kan ook stalletjies huur teen R300. Die geld sal gebruik word vir Bonnette se fonds.

Kunstenaars wat belang stel om op te tree en mense wat wil uitstal, kan vir Coetzer bel by tel. 082 682 5396.

Coetzer het aan Die Pos gesê dat die gemeenskap só sterk voel oor die onreg wat die Bonnette-gesin aangedoen is dat hulle almal vandag (Vrydag, 10 Februarie) pienk klere gaan dra by die Modimolle-hof waar mnr. Johan Kotzé (50), haar vervreemde man, en nóg drie mans sal verskyn in verband met die voorval.

Al vier staan voorlopig tereg op 17 aanklagte waaronder moord, poging tot moord, sewe aanklagtes van verkragting, sameswering tot verkragting en aanranding met die opset om ernstig te beseer.

Landdros Hannes Stoffberg is op die bank.

? Mnr. Renier van Rooyen, senior staatsaanklaer by die Modimolle-hof, het aan Lucinda Viljoen van Die Pos gesê die vier beskuldigdes het hul op regshulp beroep.

“Hulle is geregtig om enige tyd ’n hofaansoek (vir borgaansoeke) te bring. Ons sal dit dan hanteer.

“Indien Kotzé en die drie verdagtes aansoek doen vir borg, sal die hof gereed wees om die aansoek te hanteer.” Volgens Van Rooyen duur die ondersoek voort. — LiN Nuus/Die Pos