Renosterstropers vas

ROOIBERG – Twee vermene renosterstropers is vandeesweek gearresteer in die Klipgat-omgewing. Daar is beslag gelê op ‘n jaggeweer sowel as ‘n pistool. Geen renosters is gestroop nie.

Lede van die Polisie en gemeenskap het reeds sedert Sondagmiddag op die inligting begin werk.

Almal wat betrokke was om die misdadigers vas te trek word bedank: die boere wat betrokke was, spoorsnyers, wilddiefstaleenheid, PTA lugvleuel en lede van die taakmag, “rapid response” span en in die besonders die eienaar en ‘n boer van Makoppa wat hulle helikopters beskikbaar gestel het om sodoende twee polisielede ongeveer sewe ure lugtyd te gee.

Om renosterstropery in die Thabazimbi-area vas te vat is ‘n top prioriteit. Om die boere en lede van die polisie te help om die grootse taak te kan verrig word grond tot lug radio’s benodig wat die kommunikasie aansienlik verbeter. Indien enigiemand ‘n donasie wil maak om hierdie noodsaaklike toerusting aan te skaf, kontak Adjudant Havenga by 083 360 9698.

 

Deur Estie Taljaard

estie@kwevoel.co.za