Gesonde kredietrekord die moeite werd

Dis nooit te vroeg om ‘n gesonde kredietrekord op te bou nie.

Dis die raad van Young Carr, uitvoerende hoof van die Aida National Franchises-eiendomgroep. “Die meeste huiskopers het huislenings nodig – maar wat baie mense nie besef nie is dat die eerste stap om sulke krediet te bekom jare voor die besluit om eiendom te koop, geneem moet word.

“Die eerste ding waarna banke kyk wanneer hulle ‘n aansoek om ‘n huislening ontvang, is die aansoeker se kredietrekord. En dit beteken dat deurlopende goeie bestuur van maandelikse rekenings – insluitende rekenings by klere- of meubelwinkels en betalings op kredietkaarte – van deurslaggewende belang is, selfs vir jong mense wat nie beplan om dadelik eiendom te koop nie.”

Dit is ook raadsaam dat toekomstige huiskopers ‘n spaar- of lopende rekening in hul eie naam open en dit dan in krediet hou en sorg dat hulle nie enige kredietlimiete oorskry nie. “En ‘n rekord van tydige en volle betaling van ‘n groot aankoop, soos byvoorbeeld ‘n motor, sal as ‘n uitstekende aanbeveling dien vir iemand wat om ‘n huislening aansoek doen,” sê hy.

“As jy vroeg aan ‘n goeie kredietrekord begin werk, sal dit waarskynlik ook meebring dat enige kleiner ‘misstappe’ vroeg in jou loopbaan minder gewig gaan dra as ‘n daaropvolgende lang periode van goeie kredietbestuur wanneer jy die dag  besluit om ‘n huis te koop.”

Carr sê dit is veral belangrik dat mense wat aan ‘n goeie kredietrekord bou seker maak dat hulle rekenings betyds betaal. “Rekenings wat langer as 30 dae uitstaande is sal op ‘n kredietrekord aangetoon word. As die betaaldatum dus die eerste dag van die maand is moet die rekeninghouer seker maak dat sy betaling die krediteur inderdaad teen daardie datum bereik – en beslis binne die 30-dae grasietydperk. Elektroniese bankwese maak dit deesdae natuurlik baie makliker.”

Voornemende leners moet ook die implikasies van die Nasionale Kredietwet in gedagte hou. Dié wet bepaal dat banke moet seker maak dat leners nie te veel van hul inkomste aan skuld gaan afbetaal nie voordat enige lenings toegestaan word.

“Banke stel dus ‘n volledige skuldprofiel op van alle ander betalings wat die aansoeker moet maak, sowel as alle gereelde maandelikse uitgawes aan byvoorbeeld vervoer, kos en skoolgeld, voordat ‘n huislening toegestaan kan word.

“’n Mens moet egter byvoeg dat dit nie die enigste goeie rede is om jou algehele maandelikse skuldbetalings so laag as moontlik te hou nie. So ‘n strategie sal jou ook goed te staan kom indien rentekoerse in die toekoms verhoog word, ongeag of jy ‘n huiseienaar is of nie.”

Uitgereik deur Aida National Franchises