Lephalale: Malaria gebied of nie?

Die onlangse sterfte van een van twee broers van Marapong wat met malaria gediagnoseer was, het weer talle vrae rondom malaria in die Lephalale omgewing laat ontstaan.

Volgens Phillip Kruger, Senior Bestuurder van Malaria in Limpopo, verwar mense dikwels “malaria” met “muskiete”.  Muskiete is nie verantwoordelik vir malaria nie, maar is slegs die vektors (voertuie) wat malaria van een persoon na ‘n ander oordra.  Die muskiet is steriel totdat dit iemand byt wat malaria het, en dit dan oordra na ‘n gesonde persoon.

Uit die genus Anopheles, met 460 erkende spesies wêreldwyd, is slegs ongeveer 40 spesies vektors of draers van malaria.  Slegs twee spesies in Suid-Afrika is vektors, die Anopheles gambiae en die Anopheles funestus.

Die Lephalale omgewing is al jare lank ‘n malaria-vrye gebied, maar dit was nie altyd die geval nie.

Volgens Kruger is malaria in groot dele van Suid-Afrika so te sê uitgeroei as gevolg van gereelde bespuitingsprogramme deur die Departement van Gesondheid sedert 1945.  Hierdie programme word gebaseer op voortgesette wetenskaplike opnames en die historiese verspreiding van vektors.  Ongeveer een miljoen huise word jaarliks in Limpopo gespuit, waarvan 40 000 in die Waterberg omgewing is, met die gevolg dat lokale malaria in die omgewing so te sê uitgewis is.

Volgens Kruger is die meeste gevalle van malaria wat hier voorkom ingevoerde malaria, of soos wêreldwyd bekend, Airport Malaria.  Geïnfesteerde mense en muskiete uit malaria gebiede soos onder andere Mosambiek, Zimbabwe en Somalië is verantwoordelik vir die oordraging op pad- en lugroetes waar baie beweging van mense is.  Ongeveer 3 000 gevalle van Airport Malaria word jaarliks in Limpopo aangemeld.

Vanaf Januarie tot nou het twee uit die drie laboratoriums in Lephalale altesaam 39 mense positief getoets vir malaria.

Die simptome van malaria is hoofpyn, koors, kouekoors en moegheid.  Dit kan aanvanklik verwar word met griep. – Marie Hurter