WESenterprises bied leersame Boskos toer aan

Gesellig op die foto al die Obaro personeel wat die Boskos toer meegemaak het, saam met Willa Smit, Gert Versfeld en Ems Strydom van WESenterprises en Pieter en Izak Maritz van diatome Suid-Afrika.

THABAZIMBI – WESenterprises het Donderdag 19 Augustus ‘n baie geslaagde Boskostoer vir die Obaro takke aangebied.

Vroeg oggend het die eerste gaste gearriveer en na koffie en toebroodjies het mnr Richard Willats  die geskiedenis van Boskos met hulle gedeel.

Richard sê toe hy die eerste keer sien hoe bosverdigtheid die bosveld oorneem, het hy gewonder hoe kan mens die bos benut. Proewe is gedoen om veevoer te maak, maar dit het ‘n tyd geneem voor dit goedgekeur is vir registrasie, bloot omdat die departement Landbou nie besef het dat bos se voedingswaarde hoër is as gras nie.

Gedurende 1992 is Boskos toe geregistreer en die eerste korrels is in 1995 na ‘n dieretuin in Engeland uitgevoer. In die dieretuin was ‘n swartrenoster wat erg aan wanvoeding gely het. Die hoof van die staatveearts departement mnr. Piet Morkel het Richard by WES voere gekontak, so is die eerste Boskos uitgevoer en die swart renoster se lewe is gered.

Na dié baie interessante inligting , was almal reg vir die toer.

Tienuur het almal in die bussie geklim en gaan kyk hoe Thaba Motswere ontbos word.   Hier is gesien hoe word die bome afgesaag ,  die dun takkies bymekaar gemaak en  op die terrein deur ‘n “chipper” in stukkies gekap.

Die stompe van die bome wat afgesny is, word onmiddellik met ‘n boomgif behandel, sodat dit nie weer uitgroei nie. Hierdie gif het geen nadelige invloed op die natuur nie, dit maak ook nie die gras dood nie. Dit is ook wonderlik om te sien hoe vinnig die gras herstel en begin groei na die digte sambreel effek  verwyder is. Natuurlik word  die inheemse bome, wat tussen die indringerbos groei, nie uitgeroei nie.

Gert Versfeld het die hele proses gewys en verduidelik, daarna is die bussie terug fabriek toe, waar die volgende verskillende prosesse gesien is. Hierdie fyn gekapte takkies en blare gaan deur ‘n droogoond, voor dit verder met hamermeulens fyner gemaak word. Daarna word dit gemeng met sonneblom- katoen- en soja-oliekoek, fyn gemaalde lusern, mieliekiemsemels , minerale,  spoorelemente en vitamines.

Die eindproses is ‘n gebalanseerde wildskorrel wat nie net uitstekend is vir blaarvretende wild nie, maar ook gemengde vreters, grasvreters, volstruise, perde, skape, boerbokke selfs varke.

Die bietjie tanien en hoë kwaliteit vesel in die takke/blare keer dat diere koliek kry, dit is ‘n anti parasiet en –oksidant middel.

Pieter en Izak Maritz het van die nuutste proewe oor die diatome gepraat.

WES is een van die eerste voermaatskappye wat diatome in die diervoeding en lekaanvullings  inmeng. Diatome, ‘n organiese bestanddeel help om inwendige en uitwendige parasiete te beheer, diere tel beter gewig op, dit verbeter horinggroei by wild. Natuurliefhebbers sal diatome baie waardeer, dit vernietig nie jou miskruiers of erdwurms nie. Chemiese middels vernietig baie van ons miskruiers. Elke miskruierwyfie lê net een enkele eier in haar leeftyd, dus kan chemiese middels nadelig wees vir die eko sisteem.

Daar was genoeg tyd vir vrae en na ’n heerlike middagete by Plaashuis is al die Obaro mense weer terug na hulle onderskeie takke toe.

Deur WESenterprises