Wat doen jy op Loslitdag?

THABAZIMBI – Loslitdag, die dag wat landwyd daarop gemik is om mense meer bewus te maak van die lot van gestremdes, gaan vanjaar nie ongesiens in Thabazimbi verby nie.

Loslitdag, wat plaasvind op Vrydag 3 September, is ook bekend daarvoor dat werkendes anders aantrek werk toe.

Vanjaar het daar egter ‘n hele paar mense ingestem om hulle in die (rol)stoel te plaas van gestremdes. Bestuurder by Pick n Pay, JJ Durand, Spar-eienaar, Hannes Coetzee en HFM skoolhoof, Colin Campbell, het almal ingestem om hierdie dag in ‘n rolstoel deur te bring.

Lede van die nuutgestigte Xtreme Adventures, ‘n organisasie vir gestremdes in Thabazimbi, gaan die oggend op die gestremdes se parkering voor Pick n Pay wees waar hulle T-hemde ter ondersteuning van Xtreme Adventures gaan verkoop. Die T-hemde is swart met lemmetjiegroen bewoording “I support…Xtreme Adventures for the Disabled”. Die T-hemde kos R80.

Hulle gaan ook standpunt inneem teen diegene wat so gemaklik en vinnig hul motors op parkeerplekke vir gestremdes stop om inkopies te gaan doen.

Vrydagmiddag kom almal wat belangstel om Loslitdag behoorlik te vier, bymekaar agter Spar, van waar daar deur die dorp geloop, gery en gerol gaan word met plakkate. Die plakkate word deur HFM leerders gemaak.

Laerskool Thabazimbi het ook ingestem om deel te neem aan Loslitdag. Hulle het ook te kenne gegee dat hulle later vanjaar die skool meer toeganklik vir rolstoele gaan maak.

Hennie Pauw