Welbekende bosveld boer oorlede

Koos Venter (74jr), kranige bees- en wildboer, is op 20 Julie 2010 oorlede.

THABAZIMBI – Jacobus Daniel Venter, beter bekend as Koos van die plaas Matjiesfontein het op die ouderdom van 74 jaar op 20 Julie 2010 na ‘n kort siekbed gesterf.

Hy is op 24 Desember 1935 op die plaas Goedegedacht van sy ouers Piet en Cielie Venter gebore. Hy was onderskeidelik op skool by laerskole Hendriksdal en Groenvlei. Na skool het hy begin boer en is hy in 1961 met Tokkie getroud. Vyf kinders is uit die huwelik gebore, Fanie, Johan, Willem, Heinie en Susanna.

In 1968 het hy Matjiesfontein gekoop en daar begin boer. Die winkel van Akkeda Smit en die NG Kerk Limpopo was omring deur sy eiendom. Hy was jare lank lid en voorsitter van Matjiesfontein boerevereniging en was ‘n lewenslid van die Transvaalse Landbou Unie.

Hy sal veral onthou word as ‘n hardwerkende man, wat sy medemens gedien het. Menige jagter oor die hele Suid-Afrika was lief om by hom op die plaas te kom jag. Selfs dr Lukas Potgieter het al rubrieke geskryf oor sy besoeke aan die plaas Kameelpoort en Ireland.

Dit was veral sy liefde en kennis van die grond en beeste wat van hom ‘n kranige bees en wildboer gemaak langs die Matlabas.

Sy kinders en familie bedank almal wat hom bygestaan het in sy siektetyd en ds Jan Viljoen vir die erediens op 23 Julie 2010 van waar hy uit die NG Kerk op Thabazimbi begrawe is.