Paaseiers kan jou troeteldiere vergiftig

Vir baie mense beteken Paasfees om bietjie oorboord te gaan met sjokolade en lekkergoed, maar voordat jy die vierbenige lede van die gesin hiermee bederf, wees gewaarsku: sjokolade kan jou troeteldier doodmaak. “Sjokolade bevat teobromien, ‘n stimulant wat giftig is vir diere,” sê dr. Guy Fyvie, veeartsenykundige adviseur vir Hill’s Pet Nutrition. “Mense metaboliseer maklik teobromien, maar honde verwerk dit baie stadiger en dit kan dus vinnig tot toksiese vlakke in hul bloed opbou.”

Die gevaar vir jou dier hang af van die grootte van die dier en die hoeveelheid wat geëet is. “’n Groot hond kan meer sjokolade as ‘n klein hondjie eet voor hy siek word, maar die veiligste opsie is geen sjokolade nie.”

Verskillende soorte sjokolade bevat verskillende vlakke van teobromien. Kakao, kooksjokolade en donker sjokolade bevat die meeste, met die gevolg dat selfs ‘n klein bietjie ‘n probleem kan veroorsaak. Net 25 gram kan genoeg wees om ‘n hond van 20 kg te vergiftig.

“’n Klein bietjie sjokolade sal dalk net jou hond se maag omkrap, hom laat opgooi of diarree veroorsaak. Maar in groot genoeg hoeveelhede kan teobromien spierspasmas, stuipe, ‘n onreëlmatige hartklop, inwendige bloeding of ‘n hartaanval veroorsaak,” waarsku Fyvie. “As jy vermoed jou hond het ‘n groot klomp sjokolade geëet, moet jy hom onmiddellik by die veearts kry.”

Volgens Fyvie is sjokolade nie die enigste lekkerny wat skadelik vir ‘n hond se gesondheid is nie. “Lekkers kan jou hond se tande beskadig en is vetmakend. ‘n Beraamde 50% van die Suid-Afrikaanse troeteldierbevolking is tans oorgewig en hierdie vet katte en honde loop ‘n groter gevaar om diabetes, hartsiekte, artritis en kanker op te doen. Eerder as om te dink dat jy jou troeteldier ‘n guns doen deur hom op mense-happies te trakteer, kan jy inderwaarheid sy lewe verkort.”