Northam Plats wen Bosveldtrofee

Die voorsitter van Union Swartklip Hengelklub, Theuns Goosen (links), oorhandig die Bosveldtrofee aan Northam Plats Hengelklub se voorsitter, Demsie du Toit.

SETARIA – Northam Plats Hengelklub het die Bosveldtrofee vir die derde agtereenvolgende jaar gewen toe Union Swartklip en Amandelbult die loef afgesteek is by die Olifantsnekdam naby Rustenburg die naweek van 13 en 14 Maart.

Twaalf hengelaars het in elke span deelgeneem. Die span wat die meeste punte ingesamel het, is as die wenspan aangewys. Vir elke vis gevang, is 5 punte, en elke kilogram gevang, 10 punte, toegeken.

Die kompetisie het gepaard gegaan met die Northam Hengelklub se maandelikse kompetisie.

Ten spyte van ‘n hewige storm wat Saterdagaand gewoed het, en groot skade aan kamptoerusting veroorsaak het, is daar mooi visse gevang. Die altesaam 46 hengelaars wat aan die kompetisie deelgeneem het,  het ‘n totaal van 82 vis, met ‘n totale gewig van 77.30kg, gevang.

Die wenners vir die Northam Plats maandkompetisie is bepaal deur die swaarste sak wat gehengel is.

In die Senior Mans Afdeling was die wenners Theunis Botha (eerste), Gerald Burger (tweede) en Tokkie Burger (derde). Die Dames Afdeling is gewen deur Judith Pretorius met Martie Murray en Marietta Botha in die tweede en derde plekke onderskeidelik.

In die Juniors Afdeling was Jaco Geldenhuys eerste, Nico Geldenhuys tweede en daar was geen derde plek. Buffel Olivier het die Penkoppe Afdeling gewen en Mickayla Tellues was tweede.