Laerskool Koedoeskop groot rugbyplanne

KOEDOESKOP – Laerskool Koedoeskop het groot planne vir die 2010 rugbyseisoen.

‘n Toer na Nyati Sportskool waar die seuns onderrig gaan ontvang in die basiese beginsels van rugby, word beplan vir die seisoen. Weens die groeiende getalle van die skool is daar vanjaar ook ‘n O/10 spannetjie wat aan die wedstryde gaan deelneem.

Pre Crete, onder leiding van mnr Deon Azar het hul ondersteuning aan hierdie skool vasgesement in die vorm van die borgskap van die O/11 en Eerstespan se rugbytruie. Volgens mnr Gustav Grobler, skoolhoof van Laerskool Koedoeskop is dit duidelik dat die “kampioene van die betonwêreld die kampioene van die rugbywêreld ken.”

Die skool bedank Pre Crete vir hul ruimhartigheid in dié groot skenking.

Die seisoen skop vandag, Vrydag 26 Februarie af met wedstryde teen Laerskool Sanddrif en daar heers ‘n groot opgewondenheid onder seuns, afrigters en ouers. Lees volgende week die uitslae van hul eerste wedstryde.