Wenner-sjef nou by Kumnandi

THABAZIMBI – Kumnandi Lapha Gastehuis net buite Thabazimbi het nou besluit om die groot stap te neem en hulle restaurant- en kroegfasiliteite ook aan die algemene publiek oop te stel.

Sedert verlede week kon inwoners van die gastehuis reeds vanaf ‘n A la Carté spyskaart bestel. Om hiervoor en die res van die uitgebreide aantal geregte voorsiening te maak het hulle die diens van ‘n jong gekwalifiseerde sjef, Jaco Dreyer bekom. Die plan is om binnekort, sodra alles in plek is, die fasiliteite vir nie-inwonende gaste oop te stel. Voorsiening word reeds gemaak om ‘n verskeidenheid van funksies ook daar aan te bied.

Jaco en sy mede studente-sjef, Evgeni Omeltchenko, beide toe as leerling-sjefs verbonde aan ‘n vooraanstaande Sjefskool in Johannesburg, het as span verlede jaar aan die “Life Tastes Good Championship”, wat in Bangkok Thailand gehou is, deelgeneem. Hulle het dan ook as algehele wenners uit hierdie kompetisie, waaraan 27 aspirant sjefs uit 16 lande deelgeneem het, gestap.

Jaco het sommer uit die staanspoor beïndruk met sy geurige voorgeregte en hoofdisse wat op uiters keurige wyse voorgesit word. Terwyl die finale werk aan die nuwe spyskaart gedoen word, kry die res van die kombuispersoneel ook geleentheid om van die fynere kunsies van kosvoorbereiding by Jaco af te loer.

‘n Heerlike stuk kruisskyf op Jaco se spesiale sampioenbasis met rys en groenboontjies asook ‘n ligte slaai was net die ding om die smaakkliere heerlik te prikkel. Net so was die massiewe T-been met skyfies die regte medisyne vir ‘n honger maag. Beide snitte tot perfeksie gebraai.

Jaco het reeds op skool besluit om hom as sjef te kwalifiseer. Nieteenstaande byname soos Poedingmechanic het dit nie sy entoesiasme gedemp nie en het hy met huishoudkunde as vak voortgegaan en daarna by die kookskool as student ingeskryf.

Verder sluit sy stokperdjies ook nog rotsklim en hengel in en raak hy gaande oor motorfietse. Die Honda CBR600RR Fireblade is beslis ook nog stewig op sy wenslysie van motorfietse om te besit.