Plaaslike talent deur na Supersterre Top 150

JOHANNESBURG – Die derde reeks van die gewilde Supersterre sang-kompetisieprogram op SABC 2 sal vanaf 19 Maart 2010 op Vrydagaande om 19:30 uitgesaai word.

Oudisies vir die reeks het reeds vroeg vanjaar by Carnival City afgeskop met talle hoopvolles wat liedjies vanaf die Supersterre CD 1 en 2 moes voorberei en voor ‘n paneel beoordelaars optree.

‘n Besonderse talentvolle sanger van Thabazimbi, Danie Prinsloo (24jr), het op 30 Januarie tydens die oudisie by die Big Top Arena by Carnival City deurgedring tot die Top 150 semi-finaliste. Danie is ‘n bekende gesig in Thabazimbi en sy sangtalent het hom in 2007 die Idols titel van die plaaslike Landbouskou laat verower.

Danie, ‘n inwoner van Thabazimbi vanaf 2004 studeer tans argitektuur en ingenieurswese, maar beskou sy sang as ‘n passie en sien uit na die uitdunne op 12 Februarie wanneer die Top 10 tydens die finale oudisies gekies sal word.