Kinders nou teiken by winkelsentrums

RUSTENBURG – Vir die plaaslike gemeenskap van Thabazimbi en omgewing is die ideale naweek ontvlugting soms die dolle gange van die bekende Rustenburg Waterfall Winkelsentrum.

Op Vrydag 29 Januarie 2010 het die ondenklike amper gebeur toe ‘n Rustenburgse leraar se Gr 8 dogter amper ontvoer is.

Sy het saam met haar kerk se jeuggroep na die Waterfall Mall in Rustenburg gegaan om uitreikingswerk te doen. Sy het saam met haar groepie van drie geloop en was op ‘n stadium ‘n paar tree agter haar maats toe ‘n Zimbabwiese man haar aan die arm gegryp het. Hy het hom voorgestel as “Ben van Zimbabwe” en haar eenkant toe probeer trek. Sy het gevries en besef dat hierdie man iets met haar probeer doen. Sy het ook ‘n tweede een gesien wat ‘n entjie verder staan en vir hulle gekyk het. Sy het toe ook die Jeug-predikant sien aankom en sy aandag getrek. Toe hy nader kom het die Zimbabwiese man weggeloop waarna sy die Jeug-predikant ingelig het oor die voorval. Hy het die man agterna gesit en wou weet wat hy wil hê. Die man was arrogant genoeg om te sê: “I like that girl, I want that girl”. Toe die Jeug-predikant vra wie hy is het hy ook gesê: “I am a crook and dealer”.

Die realiteit is dat hierdie mense jong meisies teiken, gryp, inspuit en hulle dan wegvat. Hulle word op dwelms gesit, verkrag en as sekswerkers verkoop. Hierdie gerugte is bevestig en moet nie net ligtelik opgeneem word nie. In Rustenburg is dwelmhandel ‘n probleem.

Daar word ‘n beroep gedoen op elke ouer om hul kinders in te lig oor hierdie aaklige realiteit. Moenie dat kinders sonder toesig alleen winkelsentrums toe gaan nie.

Dit gebeur ook wanneer hulle in groepe is, leer hulle dus om oplettend te wees en alarm te maak.