Kransberg Water – die heuning uit die fonteine

Suiwer drinkwater het die afgelope paar jaar ‘n baie skaars komoditeit geword. As jy nog nie op jou knieë gegaan het en die suiwer water van die Kransbergfonteine met jou hande opgeskep en gedrink het nie, het jy nog nie vars drinkwater geproe nie.

Die Kransberg by Thabazimbi maak deel uit van die Waterberg Biosfeer en natuurlike fonteinwater is die grootste bron van water in die Kransberg. Ook geen wonder dat Jan en Christi Swart besluit het om hierdie bron van natuurlike vars water as Kransberg Water te bemark en met die inwoners te deel nie.

Die fonteinwater word met ‘n pyp na die pakhuis gekanaliseer waar dit deur ‘n filterproses gaan om alle onsuiwer deeltjies te verwyder. Vyf filterprosesse word ingespan om skoon en kiemvrye water te waarborg. Die eerste filter vang al die plantmateriaal op. Die volgende twee filterprosesse verseker dat die smaak en die helder kleur nie verlore gaan nie. Hierna word yster, wat in die water mag voorkom, verwyder en word dit aan ‘n infrarooi lig blootgestel om alle bakterieë dood te maak. ‘n Osoonfilter steriliseer dit uiteindelik in die opgaartenk vanwaar hierdie heerlike kiemvrye en gesteriliseerde produk versprei word. Die proses wat hier vooraf beskryf is, word benodig om aan die streng bepalings wat deur die WNNR (Wetenskaplike en Nywerheids Navorsingsraad) daargestel is, te voldoen. Kransberg Water voldoen aan al hierdie spesifikasies met die een groot voordeel, naamlik dit bevat geen chloor nie. Chloor word by munisipale water gevoeg om bakterieë wat algemeen in opgaardamme voorkom, te vernietig en kan nie maklik weer verwyder word nie.

Vir drinkwater kan Kransberg Water hoog aanbeveel word. Die water is beskikbaar in 350ml, eenliter en vyfliter verpakkings. Indien u verkies kan u u eie houer saamneem en nog so ‘n bietjie meer afslag op die aankoopprys kry. Om dit vir kliënte makliker te maak, het Kransberg Water ‘n Tapwinkel in Thabazimbi op die hoek van 13de Laan en Judithstraat.

Dit is juis oor hierdie kwaliteite dat Dewside Brouery, wat eersdaags in Thabazimbi open, besluit het om alleenlik Kransberg Water te gebruik in die brouproses. Dewside is die eerste kommersiële brouery om bier in Thabazimbi te brou. Die brouery sal hopenlik vroeg volgende jaar in bedryf wees en u kan verseker wees van ‘n heerlike, verfrissende Ale wat selfs in die smaak van die nie-bierdrinker sal val.

As gevolg van die natuurlike proses wat gevolg word in die brou van hierdie bier, word geen chemikalië bygevoeg om die proses te verhaas nie. Wat u kry is mout, hops, ‘n bietjie suurdeeg om die brouproses aan die gang te kry en natuurlik, belangrikste van alles, egte suiwer Kransberg Water. Die eindproduk: Dewside Ale.

Geduld is die ander komponent, want mens moet maar wag vir die natuurlike proses om sy gang te gaan vir die heerlike volronde smaak.