Ben Alberts Lodge ideaal vir jaareindfunksies
THABAZIMBI – Die bekende Ben Alberts Lodge, slegs 6km suid van Thabazimbi, huisves konferensiefasiliteite vir 40 persone en akkommodasie vir 32 persone.
Die lodge is teenaan die 2500HA ou Ben Alberts Reservaat geleë, naby die Krokodilrivier, waar die volop voëllewe en verskeie wildspesies ‘n kalmerende atmosfeer skep vir ‘n heerlike ontspanningsnaweek.
Die lodge word besit en beheer deur Sishen Iron Ore myn en streef om ‘n waardevolle bydrae tot toerisme industrie in Limpopo Provinsie te lewer.
Ben Alberts lodge bied vier lodges om van te kies. Vir die groter groep familiebyeenkomste slaap die gewilde Koedoe Lodge ‘n maksimum van 10 persone. Dié lodge het vier chalets elk met sy eie badkamer. Die sentrale sit-, eetkamer, kroeg area en ten volle toegeruste kombuis het ‘n onderdak lapa en bouma braai area.
Njala en Gemsbok lodges is geskik vir gesinne en huisves elk 8 persone. Albei lodges bestaan uit 3 slaapkamers, kombuis, sitkamer, badkamer en braai area.
Vir diegene wat bietjie privaatheid verkies, is Klipspringer die perfekte opsie. Dit bestaan uit 2 eenhede met eie badkamer, kombuis, sitkamer en slaap 6 persone. Die lodges word bespreek as selfsorg of op bed en ontbyt-basis. Elkeen is ten volle toegerus met breekgoed, beddegoed, DSTV en lugversorgers. Tariewe wissel van R475 – R575 per nag vir 2 persone wat deel. Vir groepe wat die hele lodge bespreek word 10% afslag toegestaan. Vir die meer aktiewe gaste is daar ‘n gemerkte bergfietsroete wat jaarliks deur die deelnemers van die gewilde Hardekoolbergfietswedren gebruik word.
Bring jou geliefde op ‘n voorafbespreekte sundowner en geniet ‘n glasie vonkelwyn vanuit ‘n hoë uitkykpunt, terwyl die bosveld met magiese sonsondergangkleure toegevou word of bespreek ‘n wildsrit vir die hele familie wat ongeveer twee ure duur.
Ander fasiliteite sluit in ‘n Aasvoël Restaurant waar aasvoëls ter aanskoue van besoekers gevoer word, Thabazimbi Gholfbaan vir gholfgeesdriftigers is loopafstand van die lodge asook ‘n ontspanningsarea aangrensend aan die konferensiefasiliteit.
Vir besprekings kontak Bontle 014 777 1670 of 083 304 7239.