Sages afsluiting by Thabazimbi Gholfkub

THABAZIMBI – Die laaste Bosveldliga byeenkoms wat verlede Saterdag by Thabazimbi Gholfklub moes plaasvind is op die laaste nippertjie gekanselleer weens die ongure weer. Die dreigende reën en ‘n moontlike onspeelbare nat baan het dit genoodsaak.

Die plaaslike Sages het egter verlede Donderdag ‘n baie aangename afsluiting gehou. Daar is die oggend gholf gespeel en die middag het die gades by hulle aangesluit en is daar heerlik gekuier en gebraai. Willem du Plessis verras toe almal en homself seker die meeste toe hy die dag se gholf met 47 punte wen. Hy speel die dag 11 houe onder sy voorgee, iets wat seker net so’n prestasie is as ‘n putjie-in-een. Tweede met 40 punte was Jeanette Rall en Bernie Gous met 38 was derde.
Baie dankie aan al die Sages-lede wat gespeel het en pryse bygedra het. Jan du Plooy het vir elkeen ‘n gegraveerde glas laat kry om die dag te onthou en Nico van der Westhuizen het ‘n trofee geskenk waarvoor daar nou gereeld meegeding sal word. Waterberg Sages se afsluitings byeenkoms is 3 Desember op Koro Creek.

Saterdag 28 November is dit Gekkedag. Daar gaan die dag net met drie stokke gespeel word waarvan een ‘n setyster moet wees. Dit is ‘n pretdag en die samesyn van ons lede is die belangrikste. Kom geniet die pret en verrassings wat daar dalk kan wag.