Hoe ver trek besoedeling?

Met twee kragstasies op die drumpel, is Thabazimbi-inwoners bekommerd oor die moontlikheid van besoedeling.
Terwyl Eskom nog wag op die finale resultate in ‘n studie om die ‘uitval’ van besoedeling in die Witbank-area te bepaal, vorder die bou van die Medupi-kragstasie fluks. Die nodige tegnologie om lugbesoedeling te voorkom, kan nie onmiddellik gebruik word nie, omdat daar te min water beskikbaar is. Dit sal eers in ‘n tweede fase aangebring word, wanneer die water-aanvullingsprojek voltooi is.

Hierdie en ander lug- en waterbesoedeling is bespreek tydens die vergadering van die Waterberg Omgewingsforum se vergadering op Maandag by Thaba Nkwe. Volgens mnr Jan Viljoen, voorsitter van TLU SA Noord, moet enige studies oor besoedeling ook die invloed van die beplande Mmamabula kragstasie in Botswana insluit. Volgens Viljoen is die kragstasie ook op dieselfde steenkoolveld en word water- en lugsisteme gedeel.

Die Departement van Omgewingsake was weereens afwesig en kon nie antwoorde verskaf op dringende vrae van lede nie.

Volgens dr Steve Lennon, Eskom korporatiewe dienste, is daar reeds begin met omgewingsmonitering in die Lephalale-omgewing voordat Matimba gebou is. Moniteringstasies sal ook rondom Medupi gebou word. Lennon beloof ook dat individuele monitering om die oorsaak van roes in die omgewing te bepaal, ondersoek sal word.

Alhoewel Medupi nie onmiddellik met die beste tegnologie vir die beheer van lugbesoedeling toegerus sal word nie, sal dit wel in ‘n volgende fase, wanneer die nodige water beskikbaar is, opgerig word.

Volgens mnr Hein Boegman, grondeienaar en voorsitter van die Steenbokpan-aksie groep, moet die kumulatiewe effek van projekte in die gebied in ag geneem word. Die voormalige Departement van Omgewingsake en Toerisme (DEAT) so ‘n studie onderneem het. Klaarblyklik het hulle begin met die proses, maar ‘n diensverskaffer is nog nie aangewys, volgens ‘n Eskom-woordvoerder nie. Niemand van die Departement was teenwoordig om hierdie en ander vrae te beantwoord nie. Volgens Boegman sal dit waarskynlik te laat wees om ‘n sinvolle impak te hê.

Lennon beloof egter dat ‘n konsolideerde prentjie opgestel word. Mnr Solomon Pienaar van NEMAI konsultante is besig met die opstel van so ‘n kaart.

Elana Greyling