Waterberg wildsfees trek grotes hierdie naweek

Elana Greyling

VAALWATER – Die Waterberg Wildsfees wys vanjaar groter, is beter. Die Fees wat drie jaar terug ontstaan het, bars vanjaar behoorlik uit sy nate. Met spogkunstenaars, gesinsvermaak en ‘n ten toonstelling van Waterberg talent, van skoonhede, sangers tot die mooiste wild en vee, sal te siene wees. Daar is ook elke dag pitkos vir wild- en veeboere.
Al die winste van die Fees word verdeel tussen twee skole en vier kerke. Dis waarlik ‘n fees deur en vir die gemeenskap. Die Feeskomitee bestaan uit leiers in die gemeenskap.
Die amptelike opening van die Waterberg Wildsfees was Woensdagaand, 23 September met ‘n formele Bosbanket. Pieter Koen was die gaskunstenaar en seremoniemeester wat gaste vermaak het terwyl hulle getrakteer is op ‘n vyfgang maaltyd. Elke tafel het sy eie sjef, en die omliggende lodges, wat met ‘n mandjie of drie bestanddele hul verbeelding en vaardigheid moes inspan om hul gaste te bederf. Kenwood Chef het fantastiese pryse in hierdie kompetisie om die Waterberg se beste sjef te kroon geskenk.
Donderdag het ‘n groep beoordelaars na die mooiste Bosveld bokkies gekyk en word Mej Bosveld gesoek wat gekroon is nadat Lianie May feesgangers vermaak het. Die aand se vermaak is afgesluit met Bok van Blerk en laat-aand deur Prop, ‘n plaaslike kunstenaar.
Vrydag, 25 September, behoort aan die rooivleis produsente. Vanaf 08:00 vir twee dae is daar ‘n vee en kleinvee uitstalling. Vleissentraal kom help met krale opslaan vir die stoetbeeste en skape. Vanaf 09:00 bied die RPO ‘n inligtingsdag vir veeboere aan.
Die Bosveld se baaskokke kan reeds vanaf 08:00 begin bou aan die beste potjie vir die Potjiekos-kompetisie met reuse pryse van onder meer ‘n Braaiman wat ‘n vlekvrye staal braaier as eerste prys aanbied.
Doempels en Bessie en ‘n mini-sirkus en -pretpark sal die kinders besig hou. Net ingeval iemand nog skoon is, word daar ‘n babakompetisie vanaf 14:30 gehou en mnr en Mej Bosbokkie word ook aangewys.Alle talente word beoordeel, met die Waterberg Idols wat later aan uitdunne deelneem met professionele beoordelaars. Hulle vorm die ideale voorprogram vir die bekende, Amore (19:00) en Pieter Smit (11:00). Hennie en ka-ly-do sorg tot laat vir dansmusiek.
Saterdag is die sterre wat die dag se program begin, van 08:00 die Gynkamna en perdeskou. Terwyl ruiters en perde hul beste voetjie voor sit, kan wildboere die wild van die laaste wildveiling van die jaar in die wildhokke besigtig. Die veiling aangebied deur Waterberg Game Dealers begin om 11:00. Die manne wat vier wiele bo vier pote verkies kan namiddag deelneem aan LA Sport 4×4 kompetisie om hul senuwees en remme behoorlik te toets.
Die vermaak-program is ook vol. Die oggend se vermaak word afgeskop deur Lydia van der Merwe (10:00). Die Idols finaliste wys vanaf 17:00 waarom hulle beroemd behoort te wees, net voor Wynand en Cheere. Na die duo word die Waterberg Idol wenners aangekondig. Om 21:00 is dit die beurt van die hoof kunstenaar van die aand, Kurt Darren, met Hennie en Ka-ly-do wat lekker skoffel-musiek sal verskaf.
Kosstalletjies word deur die kerke en skole beman en beloof om die beste van Bosveld lekkernye voor te sit. ‘n Groot verskeidenheid stalletjies sal ook beskikbaar wees om almal besig en aan die koop te hou.
Die Fees word Sondag afgesluit met ‘n gesamentlike erediens in die markiestent.
Enige navrae oor die Fees kan gerig word aan Denise by 0834420877. Navrae rakende die RPO Inligtingsdag kan gerig word aan Marinus van Dyk en die wildveiling aan Waterberg Game Dealers by 014-7553626.