Juweliersaak loop wéér deur

Hennie Pauw

THABAZIMBI – Binne twee weke nadat twee rowers vir 20 jaar tronk toe gestuur is vir inbrake by juwelierswinkels, vermoedelik ook by Sterns in Thabazimbi, is dié winkel weer beroof op 7 September vanjaar.
Drie gewapende rowers het op Maandag 7 September die perseel van Sterns Thabazimbi betree toe hulle hulle as klante voorgedoen het. Volgens die bestuurder, Beverley van Wyk, was hulle deftig geklee.
Hulle het beheer geneem van die afstandbeheer oor die toegangshek en aan die Sterns werknemers beveel om slegs voor hulle te kyk en sekere juwele te verwyder van die uitstalkussings en in ‘n sak te plaas.
Ringe, manskettings, horlosies, oorbelle en selfone ter waarde van sowat R108 000 is gesteel.
Volgens die Thabazimbi Polisie is die saak oorhandig aan die Ernstige Geweldsmisdaad Eenheid in Polokwane. Nog niemand is in hegtenis geneem nie.
Die dag voor die inbraak in Thabazimbi is daar by Sterns Rustenburg ingebreek, maar die modus operandi het heelwat verskil van die inbraak by Thabazimbi. Toegang is tot die perseel verkry buite werksure deur die dak.
In ‘n onlangse berig in die Kwêvoël is daar berig dat twee mans, Ronald Mabunda en Peter Mavamba, in Augustus tot 20 jaar gevangenisstraf gevonnis is na ‘n vlaag van inbrake by Sterns en American Swiss juwelierswinkels, meestal in Limpopo.
Een van die inbrake, in Mei 2006, was by Sterns Thabazimbi.