Kurper Bonanza lok goeie deelname

Gavin Henrico het ‘n karp van 8kg, die grootste nóg hierdie seisoen by die Konsentratordam, tydens die Kurper Bonanza uitgetrek. Ongelukkig tel hierdie mooi vangs nie by ‘n kurper-kompetisie nie.
Gavin Henrico het ‘n karp van 8kg, die grootste nóg hierdie seisoen by die Konsentratordam, tydens die Kurper Bonanza uitgetrek. Ongelukkig tel hierdie mooi vangs nie by ‘n kurper-kompetisie nie.

NORTHAM – Die Kurper Bonanza op Sondag 23 Augustus, aangebied deur die Northam Hengelklub by die Konsentratordam, was ‘n groot sukses en het selfs hengelaars van Rustenburg getrek. Die weer het saamgespeel en hengelaars was reeds om 06:00 by die dam om in te skryf en penne te trek. Daar was altesaam 42 hengelaars wat 184.31kg se kurpers ingeweeg het. ‘n Pragtige karp van 8kg, die grootste nóg hierdie seisoen uit die Konsentratordam, is ook tydens die Kurper Bonanza uitgetrek deur Gavin Henrico. Die vis is geweeg en nie te lig bevind nie, maar kon natuurlik geen bydrae maak tot die kurpervangs nie. Die kompetisie, wat van 07:00 tot 15:00 geduur het, se wenners is bepaal deur die drie persone wie se nette die swaarste geweeg het. Die Geldenhuys broers het met ‘n eerste en derde plek weggeloop. Jaco Geldenhuys, met ‘n sakgewig van 25.115kg, was die eersteplekwenner, Dawie van der Merwe (sakgewig van 20.618kg) tweedeplekwenner en Nico Geldenhuys (sakgewig van 18.825kg) die derdeplekwenner.