Borgdag trek lede

THABAZIMBI – Indiwiduele Stableford was verlede Saterdag op die spel by die Thabazimbi Gholfklub. Die opkoms was maar skraps aangesien baie van die lede in ‘n buurklub se borgdag gaan speel het. Die wenners tuis was Jakkie van der Wateren en Piet Venter met 39 punte. Jannie van Graan en Nita Barnard met 35 punte was ook onder die wenners. Verlede Woensdag met die Algemene Jaarvergadering is die volgende lede tot die komitee verkies: Voorsitter: Nico van der Westhuizen; Sekretaris: Ettiene le Roux; Klubkaptein : Johan Barnard; Dames Kaptein: Louise van Graan; Tesourier: Koos Prinsloo; Addisionele lede: Nita Barnard, Esme Behrens, Charlie Penzhorn, Eugene Oberholzer en Sarel Marais. Geluk aan hierdie lede met hulle verkiesing en sterkte vir die jaar wat voorlê. Daar is die afgelope jaar baie gedoen om die baan en klubhuis op te gradeer, ten spyte van die verskeie inbrake waaronder die klubhuis moes deurloop. Die nuwe komitee het daarom talle uitdagings, waarvan die eerste seker die verdere beveiliging van die klubhuis is. Vrydag 4 September is dit weer Interaksie Gholf en spanne word aangemoedig om asseblief voltallig op te daag. Saterdag 5 September speel die dames liga weg en plaaslik sal dit die maandelikse slagspel wees. Die klub se baanmeester Eddie Williams is ernstig siek en is tans in die Harthospitaal in Pretoria waar hy nog toetse ondergaan. Almal hoop dat hy gou gaan herstel en spoedig weer terug by die klub gaan wees.