Speelgoed benodig vir SAP slagoffers

THABAZIMBI – Speelgoed vir kinders tussen die ouderdomme van 7 en 12 jaar  word benodig vir die nuwe Slagoffer Bemagtigingsentrum by die Thabazimbi Polisiestasie.
Inspekteur Corney Myburgh van die Gesinsgeweld, Kinderbeskerming en Seksuele Oortreding Eenheid en konstabel Karlien Greeff van Misdaadvoorkoming, Thabazimbi versoek bydraes en ondersteuning van die gemeenskap vir hul projek om speelgoed en klere vir misdaadslagoffers bymekaar te maak.
Die items sal gebruik word om slagoffers by te staan om ‘n gevoel van selfvertroue en sekuriteit te gee wanneer hulle in die hof moet verskyn. Die items sal ook gebruik word om die nuwe Slagoffer Bemagtigingsentrum by die Thabazimbi Polisiestasie in te rig.
Sommige slagoffers was nog nooit in die bevoorregte posisie om hul eie klere of speelgoed, wat baie kinders as vanselfsprekend aanvaar, te besit nie.
Daar word dus ‘n beroep op die gemeenskap gedoen om hierdie poging ‘n sukses te maak deur items na die polisiestasie te bring. Vir enige verdere navrae kan konst Greeff geskakel word op 014 777 3525/3500.