Limpopo se Toyota Jongboer aangekondig

Elana Greyling

“Ons is trots op ons jongboere en wil hulle soos kosbaarhede oppas,” was die gevoel van mnr Francois van den Berg, president van Agri Limpopo.
Die Toyota Jongboer van die Jaar vir Limpopo is op Vrydag, 21 Augustus in Polokwane aangekondig.
Die wenner, Kerneels Hatting is vanjaar afkomstig van Burgersfort waar hy werk as plaasbestuurder vir Fanie en Willie Potgieter. Kerneels het begin as werktuigkundige en het later by Fanie oorgeneem. Hy was aanvanklik verantwoordelik vir grane en droë bone, maar hanteer tans die sitrusafdeling op die plase. Hy het drie Bosvelders uitgestof vir die titel, Corne du Plessis wildbboer en entrepreneur van Lephalale), Andries van der Waltt besproeiingsboer) en Koos van Wyk van Maasstroom (Voerkraal en beesboerdery).
Die wenner ontvang ‘n kontantprys van Agri Limpopo ter waarde van R 10 000.
Die beoordeling, onder leiding van mnr Willie van Jaarsveld, ‘n landbou-ekonoom, was streng en elkeen van die vier finaliste is persoonlik besoek en vir meer as vier ure besig gehou. Die proses is op film verewig deur mnr Gerhard Vos, voormalige Jongboer van Lephalale, wat ‘n dokumentêre DVD opgestel het.
Dis reeds die sesde jaar dat Agri Limpopo in samewerking met Toyota die kompetisie aanbied. Mnr Deon Viljoen, van Limpopo Toyota, het die jongboere geloof vir hulle vernuf, kundigheid en het Agri Limpopo gelukgewens met die hoë standaarde van hul jong boere. “Die landbou bly vir ons ‘n prioriteit en Toyota help graag om jong boere by te staan om innovering en gesonde bestuurspraktyke in hul boerdery te kry,” beloof Viljoen. Elke finalis het ‘n pakkie van Toyota ontvang.
Hatting dring nou deur na die nasionale vlak van die kompetisie waar ‘n Toyota Hilux op die spel is.