Naweek propvol vermaak

THABAZIMBI – Die jaarlikse Thabazimbi Landbou en Nywerheidskou het reeds gister afgeskop en beloof nog heelwat vermaak vir oud en jonk.
Op die musikale front vermaak kunstenaars soos Nicholis Louw, Izak Davel en Jade Storm die jonger geslag terwyl die golden oldies van country, Lance James, Jody Wayne, Vangie Coker, Ken Mullen en Clive Bruce die gehoor vermaak net na die plaaslike Idols kompetisie.  Plaaslike kunstenaars wat ook gaan optree is Jessie Lange en Victor van Wyk wat vir die ou groottes gaan wys waar Thabazimbi op die kaart is asook Rainier le Roux (wenner van verlede jaar se Idols kompetisie), Tinus Venter, Lené Campher, Nelri Benadé en Ursula Viviers van Ellisras beloof om die voete te laat juk.
Die baba fotokompetisie vind op Saterdag 1 Augustus plaas, finaliste was reeds gepubliseer in 24 Julie se uitgawe van Die Kwêvoël. Vir die manne met harde baard is daar vanjaar twee mampoerstalletjies tydens die skou asook ‘n groot verskeidenheid biltong, kos, tuisgebak, versnapperings, industriële, plaas, nywerheid en ook die ander uitstallers wat ons jaarliks kom besoek.
Vanjaar is daar ook ‘n paar eerstes tydens die skou. Vir die eerste keer in ‘n lang tyd gaan die skou ‘n jaggeweer skyfskiet kompetisie aanbied op die Koos Cronje skietbaan op Saterdag 1 Augustus om 08:30. Die Skougenootskap is ook trots daarop dat daar vanjaar vir die eerste keer ‘n maraton aangebied word op Saterdag, 1 Augustus. Afstande waarin meegeding word is 5 km, 10 km en 21 km, so die langasems kan maar solank voorberei en fiks word.  Die organiseerders van die Vlakvark Fietswedren beloof ‘n ekstra groot fietswedren vanjaar, dit vind op Saterdag 1 Augustus plaas, wegspring om 06:30. Die Thabazimbiese weergawe van “So you think you can dance! sal menige kranige dansers na vore bring.  Die amptelike Mej. en Mnr. Thabazimbi word vanaand, Vrydagaand, aangebied.  Dié glansgeleentheid tesame met ‘n modeparade gaan aangebied word deur Izak Davel en Jade Storm met die tema “Wille Bosveld”. Deelnemers word gevra om volgens die tema aan te trek.  Inskrywingsvorms vir Mej en Mnr Thabazimbi asook die Idols kompetisie is beskikbaar by die skoukantoor.
Die Hagelssaal en die Yskorsaal word gereserveer vir die wild- en jagbedryf.  Pro-Bow Archery bied ‘n boogskiet kompetisie aan en bring ook alles wat nodig is vir boogjag, van toerusting tot gekamofleerde klere. Uhuru Taxidermie beloof ‘n uithaler uitstalling ook in die Hagelssaal.
Kompetisies wat ook op die terrein aangebied word sluit in sweepslaan, toutrek en beste stalletjie. Thabazimbi Ruiterklub gaan vanjaar ‘n volle program aanbied by hulle eie arena by die perdestalle.
Kontaknommers: Skoukantoor – 0145 777-1204, Helene Stevens 072-599-9609, Ursula Roux (Mej Tbz en Think you can dance) – 083-584-6061, Paul Dreyer (Idols) – 083-402-1896, Johan du Toit – 082-879-3067, Pro-Bow Archeries – Nico – 084-713-6603 & Hannetjie – 073-674-9956, Jan Trichardt 072-476-6745.