Thabazimbi Wild en Toerisme Expo is om die draai

THABAZIMBI – Een van die grootste eko toerisme se groei punte in die land, Thabazimbi sal hierdie jaar weereens gasheer speel vir die 26ste Thabazimbi Wild en Toerisme Expo. Hierdie Expo wat beloof om ‘n ware bosveld belewenis te wees, sal plaasvind vanaf die 30 April – 2 Mei in die bekoorlike Thaba.
Aanhangers kan verseker wees van ‘n fantastiese vertoning deur Theuns Jordaan. Theuns het na sy eerste album, Vreemde Stad, trippel platinum status bereik in 1999.  Vandaar af het hy net al dieper in Suid Afrikaners se harte ingekruip deur sy unieke diep stem.  Verder kan die gehoor ook uitsien na  ander musikante soos Steve Hofmeyr, Robbie Wessels, DJ Ossewa, Bok van Blerk, ‘n lekker Boereorkes en Afrika Dansers.
Dié jaar se Expo gaan ‘n aksie belaaide naweek vir oud en jonk inhou.  Aktiwiteite sluit in: Die jaarlikse Ready-Steady-Bush Cook Out; Die Kwêvoël Potjiekos kompetisie; ‘n ope lug Roofvoël vertoning;  ‘n klassieke Cobra motor skou;  hoë engerie modder ritte; helikopter ritte; Koedoe Quad Fun Run, Bosveld Gruwel Speletjies (Fearfactor); Spar Wildsbokafslag kompetisie;  Bosveld spele (rissie eet, mampoer proe en koedoedrol spoeg kompetisies), uil demonstrasies, Mnr en Mej Thaba Expo, Wildsritte na Marakele Nasionale Park, ‘n lekker groot 60m kroeg en ‘n baie lewendige sateliet kroeg, naby die Spar Verhoog waar die meeste van die Bosveld Spele aktiwiteite sowel as die Ready Steady Bush Cook Out en Potjiekoskompetisie gaan plaasvind. Daarby is daar ‘n gesellige wyntuintjie wat ook lekker likeur gaan verkoop.
Vir die jongspan is daar opwindende ritte wat hartkloppings gaan veroorsaak en ‘n lekker kreatiewe kinderhoekie langs die paviljoen op die rugbyveld wat net gemik gaan wees op hope soetgoed, speelgoed, rygoed, drinkgoed en sommer net lekker goeters.
Met al die aktiwiteite wat hierdie jaar by die Expo plaasvind moet daar spesiale klem geplaas word op die Ready Steady Bush Cook Out wat sal plaasvind op Vrydag 1 Mei 2009 naby aan die Spar verhoog. Hierdie jaar sal die ywerige Beeld span weereens ‘n span uit die gehoor aanvat om te kyk wie dié jaar gaan koning kraai. Deelnemers kry ‘n verskeidenheid bestanddele en net 20 minute om ‘n uitstof voorgereg, hoofgereg en nagereg te maak. Hannes van Wyk (Egoli) en Johrne van Huyssteen (Disselblom) wat die aanbieders vir die naweek gaan wees, sal sorg dat die gehoor presies weet waarmee die spanne besig is en wat aanmekaar geslaan word terwyl stres en sweet die spanne aftap.  So vir ‘n goeie koppie lag medisyne moenie hierdie aksie misloop op Vrydag vanaf 11:30 tot 13:30.
Vanaf 08:00 Saterdag oggend op 2 Mei sal die vure aangesteek word vir die jaarlikse Wildspotjiekoskompetisie. Potjiekos entoesiaste kom gewapen met hul potjiekos toerusting en eie bestanddele om potjie kenner van die jaar te speel in dié gewilde kompetisie wat sal duur van vroeg dag tot laat. Spanne van tot 4 lede kan die plaaslike koerant ,Die Kwêvoël, besoek vir inskrywings vorms. Die redakteur van Die Kwêvoël, Pieter Coetzee, sal saam met Gerrie Pretorius die leiding neem en sorg vir lekker saam praat en grappies langs die potjievure.  Vodacom sal  ook betrokke wees by die kompetisie en sal bewys hulle hou nie net van klets nie, maar kook ook. Daarby kan die vriende en familie ook maar saamkuier.
Buiten die kontant pryse wat deur die hoofborg, Dewside Bier, verskaf word is daar ook nog baie lekker pryse op die spel. Hieronder is twee lekker wegbreek naweke geborg deur El Shadai Gastehuis ter waarde van R2 200 en The Livingstone Gastehuis wat R3000 werd is asook een nag vir twee persone met ‘n wildsrit en ontbyt ingesluit by Koppie Alleen Gastehuis, helikopter ritte, Shoprite geskenkbewyse van R1000, LA Sport pryse ter waarde van R3 000, ‘n Rooibok ,Landrover pryse te waarde van R 3500, Swakuru produkte ter waarde van R500 en R600 van Adventure Supply Company en Vodacom pryse.
Vir die nie kokers sal daar ‘n ongelooflike Roofvoël opelug voorlegging plaasvind ook op Saterdag 2 Mei 12:30pm tot 13:30pm by die Thabazimbi Spar verhoog. Die Suid Afrikaanse Nasionale Roofvoël Sentrum kom al die pad van Johannesburg af om ‘n groot verskeidenheid Roofvoël soorte soos uile, arende en valke te kom vertoon by die Expo. Die pragvoëls sal rondvlieg en gevoer word tydens die voorlegging. Die sentrum is ‘n rehabilitasie sentrum vir beseerde en sieklike Roofvoëls. Feesgangers is welkom om donasies te gee na die voorlegging.
Alle motorliefhebbers moet beslis 2 Mei in hul dagboeke omkring vir die Cobra Outydse motor vertoning by die ou lapa area van 09:00 tot 17:00 wat naby die sateliet biertuin geleë is.
Op 1 Mei, kan deelnemers begin inskryf vir die avontuur modderrit kompetisie om 7:00.  Die hekke sal open om 8:00 vir die publiek en die eerste ritte sal om 9:00 uur afskop. Die inskrywings fooi vir die ritte is R300 en die ondersteuners fooi is R40 vir volwassenes en R20 vir kinders.                                                         Borge kry ook die geleentheid om ‘n hek te borg en strategies op elke modder gat te adverteer. Deelnemers moet hul eie voertuie bring en aanwysings sal gegee word twee dae voor die kompetisie. Die roete vat ongeveer 45 minute om te voltooi en pryse vir die kompetisie sluit in 4×4 bybehore, bande, buitelug toerusting en kampeergerei. Deelnemers word aangeraai om nie hul kerk pakkies aan die trek vir hierdie outjie nie.
Almal moet gebruik maak van die geleentheid  om die pragtige landskappe van Thabazimbi uit die lug te aanskou per Helikopter. Die eerste rit sal opstyg die 1ste Mei en sal aktief wees die Vrydag en Saterdag.  Die ritte sal van die oggend tot sonsondergang plaasvind. Kaartjies vir die rit sal te koop aangebied word op die Vrydag oggend om 07:00. Kaartjie pryse is R120 per persoon (volgens die wet moet kinders hulle eie sitplek hê en sal hul ook vol prys betaal) vir ‘n asemrowende 3 minuut rit.
Daar is altyd tyd vir verandering en by hierdie jaar se Expo is dit beslis in die kaarte. ‘n Nuwe aanvoeging is die Bosveld Gruwel Speletjies wat sal plaasvind op die rugbyveld op 1 en 2 Mei. Daar sal 9 verskillende groep uitdagings vir deelnemers wees om te voltooi. Bring maar jou tandeborsel en seep saam om van die nare klankies na die tyd ontslae te raak. Deelnemers kan uitsien na ‘n paar lekker happies soos hoenderpote, skaap peertjies, beesmis koekies en nog ‘n paar ander wat te grillerig is om te noem. Daar sal ‘n wenspan elke dag aangekondig word wat sal wegstap met harde kontant.
Hierdie jaar is daar ook ‘n spesiale 4×4 en kampeertoerusting hoekie met groot uitstallers naamlik Landrover, LA Sports, 4×4 Megaworld, Safari 4×4, Afrispoor, Jackal Berry, World Wide Canvas, Expeditions for Africa, Kakuli Outdoor en vele meer.
Vir die dames is daar ‘n verskeidenheid klere en juwele stalletjies. Vir studente en jong volwassens is daar CD stalletjies, tydelike en permanent tatoeëring en “piercings!” Op 1 Mei vind die immergewilde Mnr en Mej Thabazimbi Expo plaas op die Thaba Spar verhoog. Die uitdun rondte vind plaas vanaf 12:00, maar die deelnemers kan vanaf 11:00 by die verhoog registreer. Inskrywingsvorms is oudergewoonte reeds beskikbaar by Thaba Spar. Die finale van die kompetisie vind plaas vanaf 16:00 en ons moedig die ondersteuners aan om die mooie dames in hul aandrokke te kom besigtig. Voorwaar nie ‘n geleentheid om mis te loop nie.
Vir diere liefhebbers is daar ponie en kameel ritte as ook ‘n perdeskou op Saterdag 2 Mei.
Thabazimbi Spar, onderleiding van Hannes Coetzee, sal weer die gewilde Wildsbokafslag kompetisie wat by die biertuin  plaasvind aanbied. Hierdie aksie gebeur op Saterdag 2 Mei en dames is ook welkom om deel te neem om vir die manne te wys wie is baas. Die biertuin sal ook toegerus wees met groot plasma skerm TV’s vir al die rugby aanhangers en ‘n skynorkes wat deurlopend sal speel.
Verdere aktiwiteite sluit onder andere in die bosveld spele, die mampoer proe en die toutrek kompetisie wat alles plaasvind by die Spar verhoog. Besoekers word ook aangemoedig om weg te lê aan die verskeidenheid kossoorte en verskillende interessante stalletjies. Wees reg om aan te sluit by die aksie belaaide naweek propvol gesin pret en vermaak.
Kaartjie Informasie:
Kaartjies is tydens die Expo beskikbaar by die hekke soos volg:
30 April 2009 (Donderdag): Volwassenes R 50; Kinders (onder 13 jaar): R25; Pensionarisse R30.
1 Mei 2009 (Vrydag): Volwassenes: R60; Kinders (onder 13 jaar):  R30; Pensionarisse R35.
2 Mei 2009 (Saterdag): Volwassenes: R60; Kinders (onder 13 jaar): R30; Pensionarisse R35.
Enige besighede wat sal belangstel om pryse te borg en daarvan sal hou om hul embleem op die fees boekie te sien, voel vry om ons so gou as moontlik te kontak.
Vir verdere inligting oor die Expo,  kontak asseblief vir Ingeborg Keyser by 012 327 6163/6601 of Ingeborg@oppikoppi.co.za. Vir enige media navrae kontak vir Tess Manders, tessm@oppikoppi.co.za.
Modder Rit Kompetisie:
Vir verdere informasie kontak asseblief:
Francois Styl: 083 7032 334
Wildspotjiekoskompetisie:
Vir verder informasie kontak asseblief:
Pieter Coetzee: 014 777 1621 voor Donderdag 30 April 16:00.
Wildsbokafslag Kompetisie:
Vir verder informasie kontak asseblief:
Hannes Coetzee: 082 576 1332