Kinders beskadig grafstene

THABAZIMBI – Kinders van Uitbreiding 13, die residensiële woongebied langs die begraafplaas in Thabazimbi, het volgens die begraafplaasopsigters tydens die April-vakansie heelwat skade aan grafstene aangerig terwyl hulle daar gespeel het.
Sewe van die grafstene het skade opgedoen toe die marmerstene heeltemal of half-omgestoot was. Toegang tot die begraafplaas word verkry deur ‘n voetgangerhek wat die begraafplaas met Uitbreiding 13 verbind.
Volgens ‘n munisipale werker wat die gronde versorg, steur die kinders hulle nie veel daaraan wanneer hulle gewaarsku word om die area te verlaat nie. Dit word blykbaar beskou as ‘n gewilde speelplek en daar is weinig sprake van respek vir die grafte of die gevoelens van naasbestaandes.
Aangesien die grond waarop die graf opgerig word, gekoop word, kan hierdie oortreders aangekla word van beskadiging van eiendom.
Die verwagting dat die skade deur boemelaars of Satansaanbidders aangerig word, is meestal nie die geval nie. Hierdie tipe vandalistiese gedrag word hoofsaaklik toegeskryf aan ongedissiplineerde kinders wat bedags daar speel of jongmense wat saans na kroegsluitingstyd hul partytjie in die omgewing van die begraafplaas voortsit, sê Gawie Hendriksz, Senior Superintendent Parke, by die munisipaliteit.
Verlede week is daar in Die Kwêvoël berig van ‘n ander geval van vandalisme toe drie hoërskoolseuns ‘n kennisgewingbord in Rooibokstraat beskadig het.
Volgens Hendriksz beoog hulle om die begraafplaas op te gradeer, die omheining te verbeter en toegang te beperk. In vergelyking met die res van die land lyk Thabazimbi se begraafplaas nog goed, sê  Hendriksz, maar dit verg baie geld en mannekrag om dit in ‘n goeie toestand te hou. Nou moet daar boonop rekening gehou word van probleme wat jong vandale kan veroorsaak.