Skaakspelers doen goed in Brits

THABAZIMBI – Elf leerders van Laerskool Thabazimbi het Saterdag 9 Februarie aan ‘n meriete-skaaktoernooi op Brits deelgeneem. In die o/12-afdeling, waarin daar 50 deelnemers was, het Scholtz le Roux, IG Theron en Armand Venter deelgeneem. Scholtz het vier van sy vyf stelle gewen en verower die derde plek in hierdie ouderdomsgroep. Beide IG en Armand het vir die eerste keer deelgeneem en hul baie goed van hul taak gekwyt. Armand het drie van vyf stelle gewen en agtiende geëindig en IG het twee stelle gewen en ‘n derde stel gelykop gespeel, wat hom 23ste laat eindig het.
Die ander agt leerders het in die o/14-ouderdomsgroep met 66 deelnemers gekompeteer. Jimmy Smith het vier spelle gewen en die laaste spel naelskraap verloor. ‘n Hoë “rating” en die feit dat van sy opponente nie opgedaag het nie, het hom sesde laat eindig. Leandri Coetzee het drie uit vyf stelle gewen, Lucius Potgieter het drie uit vyf stelle gewen en Jaco de Witt het twee gewen en een gelykop gespeel. Marnus Struwig het twee uit vyf stelle gewen, Juan Roos en Desmond Potgieter het elk een gewen en een gelykop gespeel en Hannelie van Rensburg het een gewen.
Op Saterdag 1 Maart word weer ‘n meriete-toernooi vir laerskole op Kroondal, net buite Rustenburg, gehou. Vir verdere navrae kontak juf Hantie Vorster.