Die Kwêvoël, Thabazimbi

Julius Magan besoek Emmanuel Gemeente op Vrydag, 27 Januarie 2012.

THABAZIMBI – Die gemeenskap van Thabazimb word uitgenooi om saam met die bekende gospelsanger, Julius Magan, te kuier te Emmanuel Gemeente.

Julius besoek Thabazimbi vandag, Vrydag 27 Januarie en sal vanaf 19:00 by die Emmanuel Gemeente te Vierdelaan 24 optree.

Kontak gerus vir verdere navrae 076 779 3084 of 071 573 8440.

Angela Potgieter (links) neem oor by Annatjie Dreyer as Voorsitster van Northam VLU.

SWARTKLIP – Northam VLU het op Donderdag 19 Januarie 2012 hul eerste vergadering vir 2012 aan huis van Angela Potgieter gehad. Angela is as Northam VLU se nuwe Voorsitster vir 2012 verkies en het vanaf die eerste vergadering die leisels stewig vasgevat.

Die jaarprogram bestaan uit insiggewende vergaderings, werksklasse, kompetisies en ander interessanthede, wat beloof om van 2012 ‘n besondere jaar te maak. Die nuwe bestuur is welkom geheet, en die kompetisie-artikels wat op 14 Februarie 2012 by die Streeksvergadering te Lephalale ingehandig moet word, is bespreek. Drie nuwe lede is welkom geheet. Northam VLU hou hul volgende vergadering op 16 Februarie 2012 te Swartklip. Vir meer inligting aangaande Northam VLU, skakel of sms Mari Meintjes 0820864915.

Elsabé Zietsman is volgende op die KunsteGrot se kultuur kalender.

THABAZIMBI – Op 25 Februarie kom Elsabé Zietsman vir ons kuier met “Dis koue kos, skat”.  Dis gebaseer op Marieta van der Vyver se jongste boek met dieselfde titel. Vir diegene wat nou regtig ‘n baie spesiale vertoning wil kom sien, is die KunsteGrot dié aand net die plek.  Kom beleef skitterende toneelspel!

“In Van der Vyver se jongste roman Dis koue kos, skat maak die leser kennis met Clara Brand, korrespondent van faam, deur haar ontboesemings in briewe, e-posse en fakse aan haar ontroue man, vriendinne en susters. Eintlik skreeu sy om wraak, want eggenoot Bernard het haar en hulle drie kinders gelos vir een van haar beste vriendinne!

Elsabé Zietsman, “actress, songstress, chefstress” was ernstig op soek na ’n toneelstuk sonder sang vir een vrou. Sy wil hiermee terugkeer na die essensie van teater, maar kon nie die regte werk opspoor nie. Tydens Van der Vyver se verblyf by Zietsies, Zietsman se gastehuis cum teaterrestaurant, het ’n verhoogverwerking van die roman ter sprake gekom omdat Dis koue kos, skat al die moontlikhede en  uitdagings bevat waarna sy soek. Die skryfster was summier hiervoor te vinde.

Soos die roman is Dis koue kos, skat op die verhoog ’n vreeslose, soms skreeusnaakse hart oopmaak. Dit is egter onmoontlik om ’n roman in sy totaliteit binne 70 minute weer te gee  en Strachan het op die kern van die werk en die karakter ingegaan. Die toneelstuk is slim, genuanseerd en gesofistikeerd, maar Clara huiwer nie om iets by die naam te noem nie! Daarbenewens bevat dit diep ontroerende oomblikke. Elzabé Zietsman, die aktrise hier gestroop van die kabaretbykomstighede, laat uitmuntend reg aan die teks geskied. Dit skitter en ontplof, skok en verkwik en sal mans net soveel as vroue vermaak.”

Die volgende belangrike datum op die kuns en kultuur kalender is 20 Maart wanneer Chris Chameleon die KunsteGrot besoek. Vir alle navrae en besprekings, kontak vir Rita by 083 7448559 / rivol@telkomsa.net

Oom Chris Pretorius wat 88 jaar is, wat hier sy 16kg Barrakuda vashou saam met Nolté Roets, eienaar en “skipper” van C Angel.

THABAZIMBI – Oom Chris Pretorius, Oom Drom soos almal hom ken, is 88 jaar oud en ‘n groot wildjagter wat al deur die hele Afrika getoer het, het ’n groot liefde vir visvang. Hy sit hier met ‘n yslike  Barrakuda van 16kg. Hy het dié vangs gehad saam met Nolté Roets , “Skipper” en eienaar van die C Angel.

Oom Chris word op Maandag 5 Februarie 89 en ons, sy seun Danie, Louisa en sy Vrou Marietjie wens hom ‘n voorspoedige en geseënde jaar toe, waar daar nog baie visse gevang gaan word.

Rita saam met Gerrit Pitout by die bekende “Muur” (“wall of fame”) by die KunsteGrot.

THABAZIMBI – In ‘n onlangse leserspeiling het Kwêvoël die lesers gevra wat hulle meer in die koerant wil lees. Hulle kon kies ondermeer tussen sport, misdaad, gemeenskapsnuus en kultuur. Die meerderheid lesers hunker na meer kultuur aangeleenthede aangesien hulle voel dat die ligging van Thabazimbi hulle kulturele groei ondermyn.

‘n Klein juweel in Eerstelaan, die KunsteGrot, bied onder die bekwame leiding van Rita Volschenk, een of ander vermaaklikheidsgeleentheid op ‘n maandelikse basis aan. Hetsy ‘n verhoogproduksie, kunsuitstalling of kunstenaar wat die dorp laat gons, beoog hierdie “een aand in ‘n maand” om die gemeenskap van Thabazimbi se kultuurgogga ietwat te sus.

Weereens het Rita, in samewerking met Pick ‘n Pay Thabazimbi, dit reggekry om op Donderdagaand 12 Januarie die nuwejaar met ‘n vonk af te skop met ‘n gesellige wynproe asook ‘n kunsuitstalling van die bekende Gerrit Pitout.

Bekende en nie-so-bekende landgoedwyne is vir die wynproewers aangebied. Van Chardonnay, Sauvignon Blanc, Merlot, Pinotage, Cabernet Sauvignon, Shiraz tot selfs semi-soet wyne se proppe is getrek en kon saam met die heerlike eetgoedjies, spesiale gekeur om spesifieke geure van die wyne te komplimenteer, genuttig word. Pick ‘n Pay Thabazimbi se eienaar, Francois Swart, het genoem dat hulle in die proses is om ‘n wynklub te stig vir die gemeenskap. Hulle is tans doenig met marknavorsing en beoog om die klub binne die volgende ses maande op die been te bring.

Die landskapskilder en fotograaf Gerrit Pitout het tussen die gaste rondbeweeg terwyl sy kuns prentjie mooi rondom die feestelike tafels uitgestal was.

Nuwe borgskappe, onder andere Thaba Tholo en Pick ‘n Pay, sal ook met hul finansiële ondersteuning toesien dat die KunsteGrot se deure vir nog ‘n jaar oop sal wees.

Die volgende verhoogproduksie is op 25 Februarie wanneer Elsabé Zietsman haar bekende Dis Koue Kos Skat op die planke gaan bring. Kaartjies is reeds beskikbaar. Vir alle navrae en besprekings, skakel Rita by 083 7448559 of e-pos rivol@telkomsa.net

Anita Bezuidenhout bedank Annette vir die inspirerende demonstrasie.

MAKOPPA – Strewe VLU tak het 2011 afgesluit met ‘n heerlike saamkuier.

Annette Botha van die Suikergilde het ‘n demonstrasie om kolwyntjies vir Kersfees te versier, aangebied.

Die eerste vergadering vind plaas op Dinsdag 24 Januarie te Makoppa Kerksaal. Almal is welkom.

Die netjiese selfsorg tuinwoonstelle het elk hul eie privaat ingang. Hierdie woonstelle bied slaapplek vir vier tot ses persone en is ideaal vir klein gesinnetjies.

Vir ‘n bekostigbare naweek- of vakansiewegbreek na die Suid-kus kan jy gerus die Casa Mia Gastehuis in Umkomaas oorweeg. Hier word die klem op ontspanning en kwaliteitdiens geplaas om te verseker dat hul gaste se verblyf so gemaklik en ontspanne as moontlik is.

Casa Mia Gastehuis is sowat 45km suid van Durban en ongeveer 100km noord van die Wild Coast Sun. King Shaka Lughawe is sowat ‘n uur se ry van hulle af vir diegene wat eerder wil afvlieg en ‘n motor wil huur tydens hulle verblyf.

Verskeie veilige swemstrande is binne loopafstand vanaf die gastehuis. Die sondek bied ‘n panoramiese uitsig oor see en met die voortdurende agtergrond gedreun van die branders wat op die rotse en strande breek kan jy die rustige see-atmosfeer ten volle geniet.

Al die kamers en selfsorg eenhede is toegerus met volledige badkamers, TV’s, kroegyskaste en dakwaaiers. Elke kamer en selfsorgeenheid beskik ook oor ‘n klein sluitbare kluis vir waardevolle items.

Buiten die vier en-suite dubbelbed-gastekamers, waarvan drie twee persone akkommodeer en een oor ‘n bunkerbed beskik, ideaal vir ‘n klein gesinnetjie, is daar nog vyf selfsorgeenhede, elk met sy eie buiteingang. Hierdie eenhede bied slaapplek aan vier tot ses persone. Beddegoed en handdoeke vir gebruik in die gastehuis is by alle kamers en selfsorg woonstelle ingesluit.

Vir elke eenheid en kamer is daar ten minste een parkering agter die veiligheid van ‘n gemotoriseerde skuifhek beskikbaar.

Die sondek is nie die enigste plek waar gaste kan ontspan nie. Daar is ook nog ‘n sitkamer met DStv en lugversorging, die stoepsitkamer en ‘n lekker leeshoekie waar jy rustig een van die talle boeke uit hulle versameling kan leen om te lees, indien die weer jou dalk dwing om binne te bly.

‘n Swembad, onderdak potspeltafel en braaigeriewe laat jou toe om die heerlike buitelug te geniet as jy nie lus is vir die strand se gewoel nie.

Casa Mia glo daarin om die plaaslike entrepreneurs te ondersteun en met die talle restaurante in die omgewing, word gaste eerder aangemoedig om op ‘n gastronomiese reis te gaan. Kos is van uitstaande gehalte en baie billik geprys. Op hierdie manier bied dit aan besoekers die geleentheid om die Suidkus te verken en nuwe vriende te maak.

Buiten die gewilde U Shaka akwarium en waterwêreld in Durban is daar baie besienswaardighede in die onmiddellike omgewing.

Een van die grootste krokodilplase in Suid-Afrika is slegs 4 km vanaf Casa Mia. Die Aliwal-rif, een van die bekendstes in die wêreld is neffens Umkomaas. Duik-entoesiaste kan een van die talle diepseeduikondernemings kontak vir duikuitstappies na hierdie rif. Gaste wat by Casa Mia oorbly kwalifiseer ook vir afslag indien hulle op ‘n duikekskursie sou wou gaan.

Binne ‘n 30km radius van die gastehuis is daar ‘n totaal van ses 18-putjie gholfbane om vanuit te kies. Voëlkykers is ook welkom om hulle verkykers in te pak – die Empisini Natuur Reservaat is slegs 1km vanaf die gastehuis.

Ongelukkig word geen troeteldiere toegelaat nie.

Reëlings is met ‘n plaaslike wassery getref vir die was en stryk van wasgoed teen addisionele koste.

Vir meer inligting, skakel die bestuurder, Wally by 039 973 2170 of sel 076589 6679. Besoek ook hul webblad by www.casamiakzn.co.za vir verdere inligting en besprekings. E-pos kan gestuur word aan info@casmiakzn.co.za.

Casa Mia in samewerking met Die Kwêvoël bied aan een paartjie die geleentheid om vier nagte (mid-week) vanaf die Sondag tot Donderdagoggend, gratis by hulle oor te bly. Hierdie prys beloop R2400.

Die voorwaardes hieraan verbonde is die volgende:

Slegs die verblyf vir twee persone wat deel in ‘n enkel dubbelbed-gastekamer in die gastehuis (en-suite) word gedek.

Vervoer na en vanaf die gastehuis, asook alle ritte na bestemmings tydens die verblyf is die verantwoordelikheid van die wenner van die kompetisie wat self die koste hiervoor moet dra.

Geen etes word verskaf nie.

Prys slegs geldig vir 3 maande, slegs buite seisoen.

Wenner moet ten minste twee weke vooraf bevestig of hulle wel geakkommodeer kan word. Vroegtydige bespreking is dus noodsaaklik.

Nie die bestuur van Casia Mia Gastehuis of Die Kwêvoël, vat enige verantwoordelikheid vir enige toevallige voorval wat die wenner verhoed om van die wenprys gebruik te maak nie.

Die prys kan nie vir kontant verruil word nie.

Geen korrespondensie sal oor die uitslag van die kompetisie toegelaat word nie en die besluit van die beoordelaars is finaal.

Sien die inskryfvorm vir die kompetisie in die Casa Mia advertensie elders in die Kwêvoël.

Alexis Filia, student engineer, and his girlfriend from France.

Rhino Andalusite het hul personeel jaareindfunksie verlede jaar by Dewside Restaurant gehou. Gaste is met ‘n verwelkomingsdrankie en snapperye verwelkom waarna hulle aangesit het vir ‘n heerlike buffet-ete. Na die ete het die besoekers afgeskuif na die kroeg waar die DJ die gaste tot laat aan die gang gehou het.

Vanjaar se Skouspel was groter, mooier en beter as ooit! Top-modeontwerpers het unieke uitrustings geskep, reuse-skerms met tematiese video’s het by die multimiljoenrandverhoog aangesluit en dit was die eerste jaar dat dansers ’n groot rol in die choreografie van die konsert gespeel het.

Daarby is Coenie de Villiers vereer as musieklegende van die jaar en die sowat 45 kunstenaars – insluitend die internasionale ster Patrizio Buanne en nuwe gesigte soos Charlize Berg en Die Heuwels Fantasties – het almal saam gesing aan sy bekende liedjies soos Katbos en Kambro.

Nou kan jy dit alles en meer op ’n CD en DVD huis toe vat en dit in jou eie sitkamer beleef. Met meer as 40 liedjies en keurspele en die meeste kunstenaars wat  al ooit by Skouspel was – 38 mans en sewe vroue – is dit werklik ’n versamelstuk.

Vir posbestellings is die prys R99,99 vir die CD en R139,99 vir die DVD. Pakkies word per spoedpos gestuur en posgeld beloop R45. As jy wil bestel, bel 0861-663-368 of 021-918-8811, of stuur ’n e-pos na direct.sales@onthedot.co.za vir navrae. Die DVD en CD sal ook by musiekwinkels beskikbaar wees, maar pryse kan verskil tussen winkels.

Een gelukkige leser kan die CD en DVD Skouspel pakket wen. Vul meegaande inskryfvorm in en stuur aan: Skouspel kompetisie. Die Kwêvoël, Posbus 163, Thabazimbi 0380 om ons te bereik voor Dinsdag 24 Januarie.

Afdeling Toertjies: Eersteplek – Tinkerbell - Eienaar Jessica Swemmer.

THABAZIMBI – Die eerste Troeteldierskou het op Saterdag 26 November by Thabazimbi Skougronde plaasgevind.

Talle diereliefhebbers het kom pronk met hul mooistes… en lelikstes en die inskrywings was oorweldigend.

Die kategorieë waarin die diere kon deelneem was: Grootste, Kleinste, Lelikste, Mooiste, Kostuum, Toertjies, Look-A-Like, Gehoorsaamste, Mees ongewone en Korste stert.

Ds Albert Boshoff van die AP Kerk het die dag met skriflesing en gebed geopen.

Daarna het die inskrywings plaasgevind wat gevolg was deur ‘n hondevertoning van die K9 afdeling van Ikatiseng Sekuriteits Maatskappy. Die honde is baie goed opgelei om dwelms, dagga uit te soek, asook om boosdoeners uit te snuffel. In geval van skietery en rooftogte word dié ongelooflike diere ingespan om diewe of voortvlugtiges te gaan uithaal uit wegkruipplekke waar mense nie kan ingaan nie. Die diere is opgelei om selfs in die mees gevaarlikste gevalle die boewe te ontwapen. Daar is met demonstrasies aan die omstanders verduidelik en gewys presies waartoe die honde in staat is. Daar is ook mense uit die gehoor wat probeer het om die diere se leibande vas te hou ingeval van ‘n “Rip” en selfs mense wat hulleself voorgedoen het as ‘n skelm wat deur die honde platgetrek kon word.

Daarna het die pragtige loslating van duiwe van David Birch plaasgevind, en die toeskouers verwonderd staar na die ongelooflike sterk vlug waar dier en vlerk bymekaar kom.

Die belangstelling was groot en die skou het direk daarna gevolg terwyl dit nog vroeg en koel is, onder die afdakke, sodat die diere nie enige ongemak van enige aard het nie, daar is ook gesorg dat die diere kos en water in hulle hokke en bakke het, soos die reëls van die DBV voorgelê is.

Daar was in elke kategorie baie pryse vir die eerste drie plekke, en is weereens bewys van die besighede wat geborg het se openhartigheid teenoor diere.

Volgens die organiseerders was die skou ‘n ongelooflike sukses en bedank hulle namens die AP Kerk Thabazimbi, graag die volgende persone vir hul onbaatsugtige bydraes en harde werk om die skou ‘n sukses van te maak: Al die deelnemers vir hul insette, Thaba SuperSpar, Shoprite, Pick ‘n Pay, Amper Mahala, Medhof Apteek, Block Busters, Vliegpoort Drankwinkel, Die Suiwelspens, Peacock Staalwerke, Obaro, Pampered Pooches, ook spesiaal aan die Suikerbekkies vir die skenking van die springkasteel, Ikatiseng vir die Hondeskou en Kwêvoël vir die plasing van die berigte. Foto’s: Annabelle Tromp.