DA reageer op EFF beroep vir politieke asiel vir Mugabe in Suid-Afrika

Die Demokratiese Alliansie (DA) het reageer op die EFF se beroep op die Suid-Afrikaanse regering om die voosgevegte Zimbabwiese president, Robert Mugabe asiel te verleen.

Die DA LP en skaduminister van Internasionale betrekkinge en samewerking, Stevens Mokgalapa, het die EFF aangevat oor hul onlangse stelling deur te sê dat die EFF duidelik bewys dat die party nie veel vir die belange van die groter Zimbabwiese bevolking omgee nie.

Volgens Mokgalapa sal dit ‘n skending van “vlugtelingstatus” wees as Mugabe politieke asiel in Suid-Afrika, in terme van die Wet op Vlugtelinge Wet (130 van 1998) verkry.

Die DA wil weereens net bevestig dat Mugabe nie welkom in Suid-Afrika is nie. Nie alleen het hy ‘n verwerplike menseregte rekord nie, maar om aan hom politieke asiel te verleen sal teen die wet wees.

Daarby sal Suid-Afrika ook nie in ‘n posisie wees om te kan voortgaan met sy stille diplomasie terwyl die burgers van Zimbabwe steeds sukkel nie. Wat die EFF voorstel sal nie vrede bevorder nie en beslis nie die lot van die Zimbabwiese bevolking verbeter nie.

Indien die EFF werklik oor die lot van die Zimbabwiese burgers bekommerd was, sou hy eerder saam met die DA kampveg om Mugabe uit Suid-Afrika te hou. Baie Zimbabwêrs moes uit hulle land vlug terwyl Mugabe die land in die grond in regeer het.

Terwyl Mugabe more in die parlement moet voorkom omdat hy steeds nie vrywilliglik bedank het nie, het hy sy kabinet geskeduleer om dieselfde tyd by sy huis vir ‘n kabinetsvergadering te wees.

VF Plus verwelkom Robert Mugabe se besluit om te bedank

Die VF Plus verwelkom die vreedsame proses in Zimbabwe wat gelei het tot die voormalige president Robert Mugabe se besluit om te bedank. Dit wil voorkom asof hy eindelik besef het wat die ware omvang van die situasie in die land is, sê Pieter Groenewald, VF Plus-leier.

Groenewald sê indien ʼn mens let op die spontane vreugde van die publiek in Zimbabwe is dit duidelik hoe onderdruk hulle onder Mugabe se bewind gevoel het. Hulle het in armoede en hongersnood geleef en moes toesien in watter weelde die Mugabe-gesin en hul meelopers geleef het.

President Jacob Zuma en die ANC moet kennis neem dat kiesers se geduld op ʼn sekere punt wel opraak as hulle die slagoffers is wat in armoede moet leef weens die korrupsie en magsmisbruik van hul regering. Die vreedsame revolusie van Zimbabwe kan maklik oorspoel na SA.

Die VF Plus hoop die demokrasie sal nou seëvier in Zimbabwe en dat Mugabe se opvolger nie ook sy of haar mag sal misbruik om Zimbabwiërs verder te onderdruk nie.

“Ons hoop dat die nuwe regering daar gunstige omstandighede sal skep sodat Zimbabwe ekonomies opgebou sal word en dat sy mense in SA sal terugkeer na hul land en dit sal opbou tot ekonomiese voordeel van die hele streek.”

Lesufi moet ophou om Afrikaanse skole met die sweep te slaan

Die VF Plus in Gauteng het vandag gesê die LUR vir onderwys in Gauteng, Panyaza Lesufi, moet ophou om Afrikaanse skole in die provinsie met swepe te slaan.

Dit volg op die jongste voorval waar die LUR die Laerskool Danie Malan in Pretoria-Noord aanvat in die media en op sosiale media oor die skool se taalbeleid. Volgens mediaberigte gaan die LUR en die departement ʼn ondersoek loods rondom die skool se taalbeleid.

Die VF Plus se LPW in Gauteng, Philip van Staden, sê Lesufi is moedswillig met sy politieke agenda wat hy op skole wil afdwing en dat hy deurgaans sekere skole uitsonder en van hulle sondebokke probeer maak om sy eie foute toe te smeer.

Van Staden het dit benadruk dat Lesufi blykbaar nie verstaan wat in die Suid-Afrikaanse Grondwet staan nie, en dit is dat elke taalgroep in hierdie land die reg het om in sy eie moedertaal onderrig te word. Die VF Plus wil graag weet waar Afrikaanse leerders dan heen moet gaan as hul nie skole in hul eie gemeenskappe mag bywoon om in Afrikaans onderrig te word nie.

“Die LUR se uitsprake is ʼn absolute gekheid. Die LUR is bewus daarvan dat Gauteng tans te min skole vir te veel leerlinge het. Die LUR sal moet begin verduidelik waarom daar nie skole in Gauteng gebou word nie al is daar begroot daarvoor. Waarheen moet Afrikaanse leerlinge gaan as ʼn skool te vol is? Hul kan tog sekerlik nie uit die skool gehaal word en nie ʼn opvoeding kry nie?

“Lesufi is besig met ʼn heksejag teen skole in die provinsie wat wel goed presteer en funksioneer om sodoende sy eie laksheid en swak bestuur toe te smeer.

“Die VF Plus gaan hierdie gedrag van die LUR nie langer duld nie en Lesufi sal baie vinnig in sy spoor moet trap en sy werksaamhede as LUR moet begin uitvoer en ophou om sy wil op skole af te dwing anders gaan hy homself teen ʼn muur van weerstand vanuit die Afrikaanse gemeenskap vasloop,” sê Van Staden.