Amanda de Lange: 16-01-1968 tot 14-01-2012.

THABAZIMBI – Geskokte familie en vriende is in rou gedompel oor die skielike heengaan van Amanda de Lange op Saterdag 14 Januarie 2012.

Amanda was Saterdag op die Marakele-pad, buite Thabazimbi in ‘n ernstige motorongeluk betrokke en is uit die voertuig geslinger. Sy het later aan haar beserings beswyk.

Met goeie vooruitsigte sou Amanda en haar eggenoot, Douw, op Maandag 16 Januarie 2012, albei by Black Rock in die Noord-Kaap begin werk het… dieselfde dag waarop sy haar 44ste verjaarsdag sou vier.

Amanda se roudiens het op Donderdag 19 Januarie 2012 vanuit die Nederduitse Hervormde Kerk, Thabazimbi plaasgevind. Die diens is deur Ds Hennie van der Linde waargeneem.

Hiermee bedank Douw graag al die betrokke partye, naasbestaandes, familie en vriende vir die belangstelling, oproepe en smse tydens die afsterwe van Amanda. Haar heengaan laat ‘n groot leemte in die gemeenskap van Thabazimbi. Haar vriendelikheid en spontane geaardheid gaan deur almal gemis word.