Kumba, Thabazimbi myn se nooddiensspan saam met hul brandweerhoof, mnr Henk Havenga, mnr Henry Ford en mnr Harry Barnard, Hoof Higiënis: Kumba.
THABAZIMBI – Die drie groot myne in die Thabazimbi area se brandweer- en nooddiensspanne is op Vrydagaand 25 November by Kumba se Bioskoopsaal vereer vir hul harde werk die afgelope jaar.
Mnr Henry Ford, wat tans die skakelbeampte tussen die myne is, het ‘n hartroerende toespraak gelewer tydens die Erkennings-geleentheid en het dit pertinent beklemtoon dat die gemeenskap van Thabazimbi baie dankbaar moet wees vir hierdie nooddienspanne.
Die nooddiensspan van Union Mine, Swartklip saam met hul brandweerhoof, Louis Botha.
Hierdie mense is opgeleide personeel wat beurtelings 24-uur nooddienste lewer aan die uitgebreide Swartklip, Amandelbult en Thabazimbi area. Hulle het hierdie jaar verskeie plase gered teen gewisse uitbranding, talle motorwrakke oopgesny met die lewenskake, by die mynhope met toue afgehang en het ook selfs ‘n keer of wat in die Krokodilrivier geduik, dit alles om lewens te red.
Hulle hoogs suksesvolle skyn reddingsoperasie vroeër vanjaar het die spanne instaat gestel om tekortkominge in die span en ook in hul reddingstoerusting op te spoor en kon die myne sedertdien hierdie leemte vul sodat hulle die nodige diens aan die gemeenskap kan lewer.
Die Kwêvoël bedank hierdie spanne namens die gemeenskap vir hul toewyding en diensbaarheid aan die wye Thabazimbi area. Die gemeenskap is trots om hierdie drie spanne, wat voortaan as die Crocodile Fire and Rescue team sal heet, in hul midde te kan hê.
Die nooddiensspan van Amandelbult Myn saam met hul brandweerhoof, Johan Pieterse.
