Thabazimbiese skilder, Stephanus Botha, staan hierdie by die kunswerk van ‘n luiperd waaraan hy tans werk.

Hennie Pauw

THABAZIMBI – Die talent van kunstenaars in Thabazimbi kan gerus beter ontgin word, tot die voordeel van inwoners en besoekers aan die omgewing.
Daar is heelwat kunstenaars in die Thabazimbi omgewing van wie se talente inwoners salig onbewus is. ‘n Mens kan maar hoop dat hierdie groep mense die dorp en toeriste aan Thabazimbi aan hul werk bekendstel deur uitstallings te hou en hul kunswerke vir besigtiging beskikbaar te stel.
Een van hierdie kunstenaars is Stephanus Botha, sy hele lewe lank reeds ‘n inwoner van Thabazimbi en miskien meer bekend vir die naamskilder-besigheid wat hy bedryf.
Tot sowat drie jaar gelede was Stephanus in ‘n heel ander lyn van werk, naamlik vervoer en uitgrawings, maar dit het tyd geword vir verandering en Botha het reeds van kleintyd talent openbaar. Op laerskool (in Thabazimbi), sowat 38 jaar gelede reeds, is sy kuns as voorbeeld gebruik in ander skole.
Botha skilder hoofsaaklik in olieverf. Met sommige van sy kunswerke gebruik hy ‘n tegniek, wat die gebruik van rimpelpapier (crinkle paper) insluit, om ‘n growwer tekstuur te verkry. Sy onderwerpe wissel van wilde diere soos buffels en luiperds tot natuurtonele en stillewes. 
Hy, saam met ander kunstenaars van Thabazimbi, kry reeds vir drie jaar lesse by Elreza Huygen, ‘n kunstenaar van Rustenburg. En die resultate spreek vanself. Hulle het ook al klas geloop by Kobus Moller van Hartebeespoortdam, wat hulle veral van raad bedien het oor die bemarking van hul kuns.
Volgens Botha is kunswerke ‘n vorm van belegging. ‘n Kunswerk stel ‘n kunstenaar in staat om iets of ‘n oomblik vas te vang, vir mense wat nie self die oomblik kon deel nie.
Enigeen wat Botha se kunswerke wil besigtig kan hom kontak by 083 700 3818.